Shillong, Iaiong 09 : U Dolloi ka Jowai Elaka Puramon Kynjing, ha ka sngi Balang, ula kular ban pynduh noh ia ka No Objection Certificate (NoC) bala ai sha kawei ka kompani ba kan seng ia ka karkhana coke ha u pud u sam ka shnong Wapungskur, East Jaintia Hills.
Une u Dolloi ula kular ruh ba un sa pynmih ia ka hukum ba bthah ia u Rangbah Shnong ka shnong Mookhep ba un pynduh lang noh ia ka NoC ba ula ai sha ka Om Om Coke.
U Dolloi ula ai ia kane ka jingkular sha ka kynhun ki Nongialam ka Dorbar Shnong Wapungskur ha ka jingialang kaba long ha Jowai.
“Mynta ka sngi ngi la iakynduh ia u Dolloi ka Jowai Elaka bad ngi kmen shibun ba ngi ioh ia ka jubab kaba sngewtynnad na u. Ula kular ha ngi ba un sa phah ia ka shithi ba bthah ia u Rangbah Shnong ka Mookhep ban pynduh noh ia ka NoC ban seng ia ka karkhana coke hapoh u pud u sam ka Wapungskur” ong u Rangbah Shnong ka Wapungskur Bah Postling Dhar hadien ka jingialang.
U iathuh ba u Dolloi ula kular ruh ba hapoh ka shisngi arsngi un sa thoh shithi sha ka tnad ba dei khmih ban pyntip sha ki ba ka NoC ba ula ai, ka dei kaba la khein iap noh.
U pyntip ba ka Dorbar Shnong kala leit iakynduh ruh ia u Deputy Commissioner ka East Jaintia Hills ha ka 4 tarik Iaiong bad une u khlieh ka District ula phah mar dor ia ka shithi sha ki tnad bapher bapher ba kin pynsangeh shuwa ia baroh ki kam ba iadei bad ka jingthmu ban seng karkhana coke ha Wapungskur kat bym pat pynbeit ia ka kam.
“Hynrei, ngi kwah ban iashai bha hangne ba watla ngi la dep pynbeit ia kane ka kam, ngin nym ailad satia ban seng ia kano kano ka karkhana coke hapoh u pud u sam ka shnong Wapungskur” ong u Bah Postling.
Haba pynpaw ba kam don satia kano kano ka jingiakajia pud hapdeng ka Mookhep bad ka Wapungskur, u Bah Postling ula ong “ Baroh ar shnong ki don iala u jong u pud u sam ba thikna. Hynrei la iohi shai b aka jaka kaba la tyrwa ban seng ia ka karkhana coke ka hap hapoh u pud u sam ka Wapungskur”.
Ha kajuh ka por, une u Rangbah Shnong ka Wapungskur ula pyntip ba u Chief Forest Officer (CFO) ka Jaintia Hills Autonomous District Council (JHADC) ula kular ia ka kynhun jong ka Dorbar Shnong b aka NoC bad ki jingai jingbit bala ai da ka Council ruh yn sa khein iap noh naba ka Om Om Coke kam lah ban aiti ia ki kot ki sla kiba biang.
Shuwa kane, kane ka kynhun kala leit ban mudui sha ka Meghalaya State Pollution Control Board (MSPCB), kaba ha ka 7 tarik u Lber, kala ai ia ka jingbit Consent to Establish (CoE) ia ka Om Om Coke ba kan seng ia ka LAM Coke Manufcaturing Unit kaba 1 shimney ha Thlakuru, Mookhep ha ka jinglut jingsep ba T. 4.50 klur.
U Member Secretary ka MSPCB dang shen ula kular ia ki nongialam shnong ka Wapungskur ba kan sa leit ban jurip ia ka jaka hashuwa ban shim ia ka rai halor kane ka kam.
 bala ai sha kawei ka kompani ba kan seng ia ka karkhana coke ha u pud u sam ka shnong Wapungskur, East Jaintia Hills.){kind=link}