Shillong, Lber 28 : U Myntri Rangbah ka Assam Himanta Biswa Sarma ha ka sngi Thohdieng, ula kular ban iatreilang bad ka Sorkar Meghalaya ban leh eiei halor ka jingjaboh ka lyer ha Byrnihat.
“Ka Byrnihat kumba phi iatip ba ka hap ha Assam bad Meghalaya, ngi hap ban shim lang ia ka jingbahkhlieh. Ngan sa iatreilang bad ka Sorkar Meghalaya ban pynthikna ba ka jingpynmih tdem jaboh kan duna noh” ong u Sarma haba iakren bad ki nongthoh khubor hadien ba ai jingkren ha ka passing out parade ba long ha North Eastern Police Academy (NEPA).
Ha ka 13 tarik Lber, u Myntri Rangbah ka Jylla Conrad K Sangma ula kular ha Iingdorbar ba ka Meghalaya bad Assam kin sa thaw ia ka Joint Action plan ban leh eiei halor ka jingjaboh ka lyer ha Byrnihat.
Haba wanrah ia ka suo moto statement halor ka kaiphod ba ka “Byrnihat ka dei ka jaka sor ba jaboh tam” u Conrad ula pyntip ba ula thoh sha u Myntri Rangbah ka Assam halor kane ka kam.
“Nga la kyrpad ia u (Assam CM) ban don ia ka joint action plan ( ban leh eiei halor kane ka kam) naba ka Byrnihat ka dei ka sor khappud ha kaba baroh arliang ki don ia ki karkhana” ong u Myntri haba kular ia ki nongshongshnong ka Byrnihat b aka Sorkar ka tip bha ia kane ka jingeh ba ki mad.
Watla ka Meghalaya kala shah pynngat marwei haka kaiphod, u Myntri Rangbah ula ong ba ka jingsngewkhia ka don na baroh arliang khappud bad kane ka kam ka dei kaba hap ban leh eiei na baroh arliang haba bynrap ba kidon ki ain kiba pynthikna ba ki Jylla kin iatreilang ban leh eiei ia kum kine ki kam.
