Shillong, Lber 12 : U Myntri Rangbah ka Jylla Conrad K Sangma ha ka sngi Palei, ula pynrem ia ki runar ba wiang ding ia ka Ophis jong ka National People’s Party (NPP) ha Tura, haba pynpaw ba kane ka dei ka kam sain pyrthei ka ba khlem jingmut.
“Bun ki jaka, kynthup ka Ophis ka NPP, kila shah pynjulor, shah thombor bad shah thang ha ki katto katne ki briew bad ngi da sngewsih jur ia kane. Kam don kano kano ka daw ban thombor ia ka Ophis ka party, hynrei kane ia kane ka kam la pynkylla long kam sain pyrthei bad ka Ophis ka NPP kala shah pynlong sohpdung” ong u Conrad hadien ba wan jngoh ia ka Ophis ka party.
“Nga kwah ban kren shai ia kane, ngim shym la iohi lypa ba kum kine ki jingjia kin jia. Kino kino kiba leh ia kine ki kam yn sa leh da kaba tyngeh pyrshah ia ki kat kum ka lynti ka ain” ula maham.
U Conrad ula kyntu ia ki nongtrei ka party ba kim dei ban sheptieng. “Kito kiba thang ia ka Ophis jong ngi mynta ki lah ban pyrkhat ba ki lah ban pynkut ia ka NPP. Hynrei baroh ngi tip ba ka NPP ka im ha ka dohnud jong ki briew”.
Ula kular ban tei biang ia ka Ophis da kaba kham bha bad ban nang pynkhlain ia ka party, bad ong “Kane ka dei ka khubor ba nga kwah ban ai sha baroh ki nongtrei ka party bad ki nongialam ha kane ka por”.
 ha Tura, haba pynpaw ba kane ka dei ka kam sain pyrthei ka ba khlem jingmut.){kind=link}