Nongpoh, Nailar 18: U Myntri Rangbah ka Jylla Conrad Kongkal Sangma ula kular ia ka Mawhati Farmers Association ba ka Sorkar Jylla kan sa pynioh noh ia ka Processing Unit ba treikam da ka bording ba pynmih naka sngi (solar) ba kan lah pynmih ia ki jait mar bapher bapher na u sying.
U Myntri Rangbah ula kular ia kane ha ka jingiakynduh bad ki Nongrep sying bad ki Nongialam ka Mawhati Farmers Association hynnin ka sngi Balang.
Haba pyntip ba ka Sorkar kala phaikhmat kyrpang bha sha ka jingeh jong ki paid nongrep kaba pynlong ruh ia ka sorkar ban wanrah ia ki prokram bapher bapher kum ka FoCUS bad FoCUS+, u Myntri Rangbah ka Jylla ula ong “ Ka Sorkar ba mynta ka dei kaba kitkhia shisha ia ka bha ka miat ki paid nongrep bad kala rung ha manla ki kyndong kynshrot ka Jylla ban sam ia ki song jingiarap naka FoCUS, ka ban kyrshan ia ki nongrep ba kin lah pynmih khambun ka marrep”.
Kum shibynta jong ka Ginger Mission ne ka Mission rep sying, u Myntri Rangbah ula ong ba ka Sorkar kan sa pynioh ia ka Processing Unit ia ki nongrep ka thain Mawhati, ba kin lah pyndonkam ha kaban pynmih ia ki mar bapher bapher ba shna na u sying.
“Kane ka Processing Unit kan long ka jingkyrkhu kaba khraw ia ki nongrep ba kin lah kyntiew ia ka ioh ka kot bad kan aikam aijam ruh ia ki nongshongshnong ka thain” ula ong haba ai nuksa ia ka Lakadong Mission kaba la aikam da ki spah ngut ki Longkmie ban pynmih ia u shynrai uba pawnam ha ka Jylla wat shabar ka Ri ruh kumjuh.
Ha kane ka sngi, ka Mawhati Farmers Association kala aiti ruh ia ka dorkhas ha u Myntri Rangbah ka Jylla kaba pynpaw ia shibun ki jingdonkam jong ki paid nongrep ka thain ban lah kyntiew ia ka kam rep kam riang.
