Shillong, Nailur 10 : U Myntri Rangbah ka Jylla Conrad K Sangma ula kular ba ka Sorkar kan ialeh ban pyniahap ia ka jingdonkam ban pynthikna ba ki nongshongshnong kin nym mad jingeh bad kino kino ki briew, ki bym dei ki nongshongshnong ka Jylla, kin shah kynthup ha ka Electoral Roll ka Jylla.
“Ai ba ngan kular ba ngin leh kat kaba lah ban pyniahap ha kaba ki nongshongshnong ba dei hok kin ym shah pyndik bad kito ki bym dei ki nongshongshnong ka Jylla kin ym shah kynthup ha ka electoral roll” ong u Conrad ha Iingdorbar Thaw Ain ha ka sngi Balang.
Haba jubab ia ka cut motion, u Myntri Rangbah ula ong ba ka Summary Intensive Revision (SIR) bala tyrwa jong ka Electoral Roll ka long ban leh eiei halor ki jingsngewkhia bala pynsngew da ki dkhot, ka ban pynthikna ba ka Electoral Roll ka dei kaba la pynthymmai bad ka bym don jingbakla, duplicate ID bad kiwei kiwei ki jingbym biang.
U Myntri Rangbah ula batai ba ka SIR kan kyntup ia ka jingleit lum kyrteng na kawei ka thliew iing sha kawei pat, ha kaba man ki nongthep vote kin hap ban aiti ia ka form pynrung kyrteng.
Hynrei, ia ki nongthep vote bala pynrung kyrteng ha ka electoral roll kat haduh ka 1 tarik Kyllalyngkot, 2003, yn ym donkam shuh ia ki kot ki sla ba kin aiti lang.
Ka ECI kalarai ruh ban pyllait noh ia kito ki briew kiba la pynrung kyrteng ha ka electoral roll ha u snem 2003, ban pynduna ia ka jingeh ia ki nongshongshnong bala tynmen.
Myntri Rangbah ula ban jur ba ka SIR ka long kaba donkam ban pynbeit ia ki jingkylla kiba khraw kiba la jia hapoh ka Jylla ha kine ki 20 snem, kynthup ka jingnang heh ki jaka sor bad ka jingkrih shnong ba khari khari.
U Conrad ula kular ruh ba ka Sorkar kan ai ia ka jinghikai kaba pura sha ki Booth Level Officer (BLO) ban pynthikna ba kin biang nadong hadong ha kaban leh thikna ia ka SIR.
