Shillong, Naitung 24 : U Myntri Rangbah ka Jylla Conrad K Sangma ula kular ban leh da kaba tyngeh ia ki nongpynmih ia ka jingkulmar hapdeng ka jingialang jong u bad ki kynhun Sengbhalang bad maham dakaba ong ba ki Pulit kila ioh ring video bad ithuh ia baroh ki briew kiba kynshoit.
Katba u CM u dang iashong jingialang bad ki Nongialam ka ACHIK, GHSMC ha CMO Tura. Ki paidbhur kila pynmih ia ka jingkulmar bad lun maw ia ki Pulit lem bad ia ka Ophis CMO, kaba lam sha ka jingmynsaw jong bun ngut ki Pulit.
Haba kynthoh ia kane ka jingjia, u Conrad ula ong “Ka jingjia ba mynta ka sngi ha Tura, shabar ka CM Secretariat bad ka Ophis u Commissioner of Division ka dei kaba sngewsih jur bha”.
Ha kajuh ka por, ula pynrem ia kane ka jingkulmar bad ban jur “Kane kam dei ka kam kaba ka Ri-lum Garo kala ju mad”. Ula ban jur ba kaei kaba jia ha ka janmiet sngi Nyngkong ka paw kum ba ka dei ka buit jong ki katto katne ki kynhun khwan myntoi.
“Kat kaei kaba ngi la iohi ka pyni ba ka dei kawei pat ka buit jong ki katto katne ngut ki briew. Kumba nga ong, wat ki Sengbhalang kila pyntip ba kine ki briew kim dei kiba iadon bynta bad ki bad ba kim ithuh ruh ia kine ki briew kiba donkti” ong u Myntri Rangbah.
Haba pynpaw ba ki bor Sorkar kila ring video ia kaei kaba jia hynne baroh shisngi bad ba kin sa leh eiei pyrshah ia kine ki briew, ula ong “Ngi don ia ka video ba pura bad ki jingtip ba bniah ia baroh kine ki briew kiba kynshoit…khlem pep ki Pulit kin sa leh eiei kat kum ka lynti jong ka ain”.
Ha kajuh ka por, u Myntri Rangbah ula ong ba ka jingialang bad ki kynhun Sengbhalang kiba shong shah jingit ka long kaba seisoh bad ngi la dep mynjur ba ngin sa shong jingialang biang ha Shillong ban nang iakren shuh shuh bad sa kiwei dei ki kynhun namar kane ka kam ba ngi iakrren ka dei kaba ktah ia bun ki Jaidbynriew bad ka ban ktah ia ka Jylla baroh kawei.
U ong ba dei haba ka jingalang kala jan wai artad, la iohsngew ia ki jingpyrta slogan bad katto katne ki runar ki bym lah ban ithuh, kila kawang maw sha ka CM Secretariat ban pynthut ia ka jingialang.
Pule lang ia kane: Pynjari ka Sorkar da ka Korphiw miet ha Tura ba mih ka jingkulmar na ka jingiakynduh u CM bad ki Sengbhalang
