Shillong, Jymmang 13: U MLA ba dang shu shah jied jong ka UDP na Sohiong Bah Synshar Kupar Roy Lyngdoh Thabah, hynne ka sngi Saitjain ula kular ban wanrah ia ka jingkylla ha Sohiong haba buh ia ka ILP, Roster System bad ka Uniform Civil Code (UCC)kum ki mat treikam ba hakhmat eh jong u.
Ha kajuh ka por, une u MLA ula ong ba ka jingjop jong u, ka dei ka khubor kaba shai bay m don mano mano ruh kiba lah ban thied ia ki paidbah ka Sohiong da ka pisa bad ka juk thymmai ha kane ka constituency kan sdang naduh lashai ka sngi.
“Kane ka dei ka khubor kaba shai ba wat ju wan ban thied iaki paidbah ka Sohiong da ka pisa, phi dei ban thied iaki da ka jingieid” ong u Bah Synshar haba iakren bad ki nongthoh khubor hadien ba jop ia ka elekshon da 3422 vote.
Une u kyrtong ka UDP ula pynliem ia u kyrtong ka NPP bad MLA barim ka Sohiong Bah Samlin Malngiang da kaba ioh 16679 vote.
U Bah Synshar ula ong ba ka jingsngewlem bad ka jingieid ba ki paidbah ki don ia u kni jong u Bah HDR Lyngdoh ka dei kawei na ki daw ha lyndet kane ka jingjop. U Bah HDR Lyngdoh uba dei u Myntri kam pohiing barim ka Jylla, ula khlad noh ha ka 20 tarik Rymphang 2023.
“Namar kata, kumba nga ong, nga dei u nongpynbteng ia ki kam jong u Kni uba la noh shibun ka synniang sha ka constituency. Nga leh kat kaba nga lah ban wanrah ia ka roi ka par ka Sohiong constituency” ula ong.
Haba pynkynmaw ia ka jingkwah u Bah HDR Lyngdoh ban pynbha pat ia kaei kaba la pynsniew da u MLA barim ka constituency, u Bah Synshar ula ong “Ka Sohiong kala ring tyrkhong ha kine ki san snem bala leit noh bad nga tharai naduh lashai ka sngi, ngin sdang ia ka juk thymmai ha ka constituency. Ka jingkylla ha Sohiong constituency kan sdang lashai ka sngi”.
Nalor kane, une u MLA ba thymmai ula ong ba ka jingkyntiew kyrdan ia baroh ki jaka pule kan dei ka kam ba un buh hakhmat eh ha ka jingtreikam jong u namar um kwah ban iohi ba ki samla pule ha ka constituency kin iehnoh shiteng por ia ka jingpule.
