Shillong, Jymmang 13 : Ka Khasi Students’ Union Laban Circle , hynne ka sngi Saitjain kala pynlong ia ka jingkhynra ia ki dukan bam/sha kiba don ha thain Laban, Lumparing, Lumshatsngi bad K.O.R ban pynthikna ia ka jinglehkhuid, kaba lah ban ktah ia ka koit ka khiah u nongbam.
Ka KSU kala shim ia kane ka sienjam halor ka jingiohpdiang ia ki jingujor na ki paidbah ba kiba bun ki dukan ki dei kiba lehsih bad kim phikir satia ban lehkhuid ia ka bam ka dih ha kaba bun sien ki briew ki ju ioh pang na kaba bam ia ki jing bam na kine ki dukan.
Ha kane ka jingkhynra ia ki 27 tylli ki dukan bam baroh lang, ka KSU kala lap ba bun na kine ki dukan kim don satia ia ka lisen n aka FSSAI kaba shah ia ki ban plie bad die ia ki tiar bam bad la lap ruh ba don ki katto katne ki dukan kiba ka jing jaboh ka long kaba ishyrkhei.
Halor kane ka jingshem, ka KSU kala phah khang khyrdep shuwa ia kine ki dukan kat ba kim pat lahban pynkhuid kat kum ki kyndon bala buh da ka FSSAI. Kine ki dukan ki dei ka Appayani Tea Stall ha Laban, Babua Tea Stall ha Lumshatsngi, Dada stall ha Red Cross bad Ruma Das Tea Stall ha Laststop.
Ka Seng ha kine ki sngi kan phah ruh ia ka kaiphod jong ka jingshem sha u Food Inspector, FSSAI bad u Myntri ba dei peit ba kin leh ia kaba donkam.
Ka Seng ka kyntu ruh sha baroh ki dukan bam ba kin long kiba leh khuid khang ba ka nym ktah ia ka koit ka khiah jong ki paidbah.
