“Ngi la iakren ruh ia ka ILP, MRSSA bad ka Ktien Khasi bad GarO”: CM
Shillong, Naiwieng 24 : U Myntri kam Pohiing ka Ri, u Amit Shah ula kular ban phah tohkit ha ka Central Bureau of Investigation (CBI) ia ka jingther kuli ki Pulit Assam sha ki riew paidbah ha Shnong Mukroh, West Jaintia Hills, kaba lam sha ka jingiap ki 5 ngut ki briew na Meghalaya bad uwei u Forest Guard ka Assam.
Ia kane la pyntip da u Myntri Rangbah ka Jylla Conrad K Sangma uba la leit ryngkat bad ki Myntri Sorkar, ban iakynduh ia u Amit Shah hynne ka sngi ha Nongbah Delhi.
Met Hon’ble Union Home Minister, Sh. @AmitShah Ji today with our Cabinet colleagues to apprise him about the unfortunate firing incident in Mukroh village that claimed 6 precious lives.@narendramodi @himantabiswa pic.twitter.com/hAKF1H8vfx
— Conrad Sangma (@SangmaConrad) November 24, 2022
“Ngi la batai ia u (Amit Shah) halor ka jingjia ba sngewsih ha Mukroh, West Jaintia Hills kaba jia ha kine ki khyndiat sngi bala leit ha kaba 6 ngut ki mynsiem kila iap…Ngi la batai ia ki daw ba lam sha kane ka jingjia kat kum ki jingtip ba ngi la iohpdiang” ong u Conrad.
“Ngi la iohi ruh ia ki jingkren kiba mih na u Myntri Rangbah ka Assam ba ong ba kane ka jingther kuli ka dei kaba khlem daw bad ka don ka jingpyndonkam palat pud ia ka bor da ki Pulit ka Assam” ula bynrap.
Ula ong, “Haba buh ha ka jingmut ia kine kiei kiei, ngi la kyrpad ia ka Sorkar India ban thung ia ka jingtohkit jong ki Central Agency halor kane ka jingjia la ka dei ha ka CBI ne NIA khnang ba ka jingshisha kan mih bad kaba kham kongsan eh ka long ba ka jingpynsajia kan don ia ki briew kiba donkti”.
U Conrad u iathuh ba u Myntri Kam Pohiing ka Ri ula ai ka jingkular ban sa thung ia ka jingtohkit jong ki Central Agency bad ka hukum halor kane, kan sa mih ha kano kano ka por.
Shared with Hon’ble Union HM that the root cause of the tension that has been building up in the area and the other areas has to do with the long-pending border issue between Assam & Meghalaya.
— Conrad Sangma (@SangmaConrad) November 24, 2022
U Conrad u pyntip ba nalor kane ka kam, la pyntip ruh sha u Myntri ba ki daw tynrai halor ki huri hura kiba mih ha kane ka thain bad ha kiwei kiwei ki jaka khappud ka dei namar ka jingiakajia pud kaba la don la slem bha.
“Ta ka daw la donkam ban shimkhia ha kaban pynthikna ia ka jingiapynbeit noh ia ki jingiakajia pud” ula ong.
Haba pynpaw ba mynta bala jia kane ka jingjia ha Mukroh, ka jingiakren pynbeit pud kala iatakhuh jingeh bad ki don bun ki jaka kiba hap ban ialeh ha kaban ioh pat ia ka jingshaniah bad namar kata, ka jingtuklar lem jong ka Sorkar India ka long kaba donkam.
“Ngi la iakren ruh ia ka jingshong shngain jong ki paidbah ha Khappud khamtam ha ki jaka ba iakajia pud bad ngi la kyrpad ia ka Sorkar India ban shim ia ka sienjam ka ban pynthikna ba baroh artylli ki Sorkar Jylla ba kin iatreilang bad ban pynthikna ba kum kine ki jingjia (Mukroh) kin ym jia shuh bad ba ki bor District bad ki Pulit kin iatreilang ban lah kiar ia kum kine ki jingjia hadien habud” ula ong.
“Ngi ai khublei ia u Myntri kam Pohiing halor kane ka jingshimkhia” ula ong
U Myntri Rangbah ula pyntip ruh ba ha kane ka jingiakynduh ia u Amit Shah, la iakren ruh halor ka jingpynrung noh ia ka ktien Khasi bad Garo ha ka khyrnit kaba phra, ka jingdawa pyntreikam ia ka Inner Line Permit (ILP) kaba la dep mynjur ruh da ka Resolution ha ka Iingdorbar bad ban shah ia ka Jylla ba kan pyntreikam noh ia ka MRSSA kaba dang don hapdeng ka jingbishar jong ka MHA.
Kiba la synran ia u Myntri Rangbah ki kynthup ia u Symbud Myntri Rangbah ka Jylla Bah Prestone Tynsong, u Myntri kam Pohiing ma Lahkmen Rymbui, u Myntri ka PHE bah Renikton Lyngdoh Tongkhar bad u Myntri ka Tnad C&RD Bah Hamletson Dohling.
