Shillong, Rymphang 03 : Ka Sorkar Meghalaya Democatic Alliance (MDA) ba ialam da ka National Peoples’ Party (NPP) kala ai ka jingkular ban kynthup lang ia baroh ki nongtih par kynthup kiba rit ba ria ha ka jingtih dewiong kat kum ka jingstad saian hadien ba ka Sorkar Pdeng kala ai jingbit ia ka Jylla ba kan sdang noh.
Ha ka 29 tarik Kyllalyngkot, lai tylli ki soskular Escrow la iasoi hapdeng ka Controller of Coal, ka Sorkar India bad ki Nongtih par dewiong ha shnong Pyndengshalang ha West Khasi Hills, Saryngkham ha East Jaintia Hills bad ha Lumiakhi Wahsarang ha East Jaintia Hills.
Kine ki soskular ki dei ka sienjam ba kongsan bha ban sdang biang noh ia ka jingtih dewiong ha Jylla.
“Mynta, ka sienjam ba ngan shim ia nga ka long ban kynthup lang ia ki nongtih dewiong ba rit ba ria” ong u Myntri Rangbah Conrad K Sangma ha ka jingiakren bad ki lad pathai khubor ha ka taiew bala lah haba pynbna ia ka jingsdang ka jingtih dewiong kat kum ka jingstad saian ha Meghalaya.
Ula jubab haba kylli ia ka jingdawa ki nongtih dewiong ban pynkylla ia ka SOP ba ki aplikeshon ban ioh Licence tih dewiong ka dei ban long ia ka jaka ba ym duna ia ka 100 hectare.
“Ngi don ka jingsngewkhia ruh ia ki nongtih par ba rit ba ria hynrei kumba nga long ngi don ha ka lynti kaba ngi hap ban jam shakhmat ban iakren bad ka Sorkar India bad ngim don satia ha ka khep ba ngin pan than ia kaei kaei baroh” ong u Conrad haba batai “Ngi la dep iasaid lupa ba peit ka riti bat khyndew ka iapher ha Meghalaya bad kumta ki nongtih par shimet ki dei ban ioh ia ka licence, ka Sorkar India kala ong ba kam lah ban long namar ba ym lah ban leh ha ki par shimet hynrei ngi la batai ia kata, bad ka jingiakren ka dang iaid halor kane ka bynta. Ka mat hangne ka long ba kila don lypa shibun ki kyndon bad shibun ki kam kiba long kongsan bha ha kaban jam shakhmat bad kumta ngam don satia ia ki lad ban iapan than na ka Sorkar India”.
“Kumta haba ka mih ka jingiakren halor ka 100 hectare,haba nga la kren ia kane ka kam, kane ka 100 hectare ka dei ka kyndon kaba la buh ha baroh kawei ka Ri bad ka dei ka Policy ka Sorkar India. Mynta ban wanrah ia ka kyndon bad pynduna ia ka sha ka 10 acre ka dei kawei pat ka jingpan kaba nga hap pynmynjur ia ka Sorkar India, ia kaba ka sngew ba lada nga tynruh than bad tynruh ia bun kiei kiei lehse kiei kiei baroh ki lah ban pulom. Kumta, ai ba ngan tynruh shuwa ia ka 100 hectare bad hadien ba urlong kane, ngan sa iasaid biang ba 90% na ki nongtih par jong ngi ki dei kiba tih par ha ki jaka ba rit, ngi donkam ban pynkylla ia kane ka 100 bad pyndam noh ia uwei u nod ne lehse artyllu u nod, ngin sa leh ia kane” ula ong.