Shillong, Jymmang 30 : Ka Sorkar Jylla kala kular ban thung da ka jingtohkit halor ki jingkynnoh treikam bymhok, pyniaid kam bakla jong u Vice Chancellor ka National Law University, Meghalaya (NLUM), Prof Indrajit Dube.
Ia kane la pyntip da u General Secretary ka Khasi Students’ Union (KSU) samla Donald V Thabah hadien ka jingaiti ia ka jingujor pyrshah ia u VCka NLUM sha ka Myntri ba khmih ia ka tnad Ain Kong Ampareen Lyngdoh hynne ka sngi Thohdieng.
“Ka (Ampareen) kala pan 2 bnai ( ka por) ban pynlong ia ka jingtohkit bad ban sa aiti ia ki jingshem sha ka Governing Council bad ka Executive Committee jong ka University, kiba kynthup ia ki Judge ka High Court ba kin shong bishar ia baroh ki jingujor” ong u Bah Donald haba iaren bad ki nongthoh khubor.
“Ha ka jingshisha ngi dawa ban wengkam noh ia u Vice Chancellor hynrei la iohi ba ki don katto katne ki jingeh halor ka jingweng kami a u tangba kila kular ba kin sa aiti ia ki jingshem jong ka jingtohkit sha ka Finance Committee bad ka Executive Committee….ban kin sa leh eiei halor kane” ula bynrap.
Ia ka jingujor bala mudui da ka KSU la pynlong nongrim kat kum ki jingshem RTI ba kynnoh ia ka jingpyndonkam bakla kaba jur ia ka pisa da u Vice Chancellor nalor shibun ki jingleh bym hok ha ka thungkam thungjam.
“Ha ka 25 tarik Rymphang, 2025, ka Seng kala phah ia ki jingthoh shaphang ki jingleh bym hok ha ka jingthungkam thungjam sha kiba bun ki dkhot jong ka Governing Council ka NLUM kiba ki dkhot ki kynthup ia ki Judge ka Meghalaya High Court, ki Ophisar na ka Sorkar Jylla, u Vice Chancellor bad kiwei kiwei ki kynhun,ha kaba ha ka jingialang jong ka General Council ba long ha ka 26 tari Rymphang, 2025, kala iakren ia kane ka kam bad la shim rai bad ai jingbthah ruh ia u Vice Chancellor hynrei sngewsih ba u Vice Chancellor u khlem leh eiei ban pynbeit ia ki jingleh bakla ia kaba la ioh jingtip da ka seng hadien ba ioh ia ka jubab na ka RTI” ong u samla Donald.
“U Prof Indrajit Dube ula pyniaid donbor ia ka NLUM, thung ia ki nongtrei kat kiba iajan bad u bad kyntait ia ki trai riewlum kiba lah ban trei ia ka kam bad um don jingkwah ruh ba ka NLUM kan kiew hynrei u pyrkhat tang ia ki jingmyntoi shimet” ula ong haba bynrap “Katto katne na kiba la shah thungkam kum ki nonghikai ruh ki dei kiba la thung jied namar ki dei ki bahaiing hasem jong ki Heh Ophisar ka Jylla”.
Ka KSU kala kynnoh ruh ba u Prof Indrajit Dube u ju leit man ka por sha Delhi, Kolkata bad kiwei ki bynta jong ka Ri da ka pynlut na ka pla tyngka jong ka University bad bynrap ba wat ka jingleit jong u kum u VC ne na ka bynta ki kam ka University ruh kim shym la don satia ia ki kot ki sla ban pynshisha kum ki shithi shah khot sngewbha lane kino kino ki kot ki sla.
Ka ong ba ka RTI kala shem ba naduh ba sdang treikam ka NLUM ha u 2023, u ProfIndrajit Dube ula pynlut haduh T.15.10 lak ha ka kam leit jingleit jong u ba kynthup ia ka jingthied tiket liengsuin, jaka sah, ka bam bad kiwei kiwei, ia kaba bun la ikop kum ka jingleit shimet, kumta ka dei ka jingpynsyrwa kai ia ka pisa ka Sorkar ne paidbah na ka bynta ka jingmyntoi shimet.
Haba pynpaw ba u Vice Chancellor u don hok ban ioh ia ka medical reimbursement (pynphai ia ka jinglut ba leit sumar) bad haba leit jingleit bad jaka tang na ka bynta ki kam ka University, ka Seng ka ong ba kala ioh lum ia ki spah tylli ki receipt ba u pynlut ha ka bam, kaba kot da ki lak tyngka.
“Ka seng kam sngew khohnioh ia ka jingpynlut ha ka bam namar ka long kaba donkam hynrei kat kum ki receipt bala ioh, ka pyni ba u Prof Indrajit ula pynlut sahuh ha ki jingbam ha ki restaurant kiba rem dor, ki coffee na ‘Starbuck’ bad kiwei kiwei bad ia ka bill pat la hap ban siew da ka Sorkar Jylla”.
Ka Union ka kdew ruh ba kat kum ka RTI, ka NLUM kala pynlong ia ka jingialang “Climate Investment Coalition for the Global South’ ha ka 20 tarik Rymphang, 2025 ha Delhi bad ka mang tyngka baroh bala mang ia kane ka prokram la buh T.25 lak.
“Ka Seng kam don jingsngew haba iadei bad ka prokram bad ki jingpynlut ia ka hynrei ka pynrem pat ba ia ka pisa ka Sorkar la pyndonkam ha ka jingiadih kyaid sadhai. Kat kum ka bill, la shem ba ka pisa ba T.3,56,750 la pynlut ha ka kyiad da u Prof Indrajit ha kane ka prokram. Kane ka dei ka jingpyndonkam bakla ia ka pisa bad ia kum kane ka jingpynsyrwa kai ia ka pisa dei ban siew da ma u sha ka Sorkar Jylla” kala ong.
Une u Nongialam ka KSU ula kynnoh ruh ia ka jingthungkam beain bad siew tulop beain da u Vice Chancellor sha u Prof. of Practice, Prof. of in Residence, Associate Professor in Residence, Research Fellow, Post-Doctoral Fellow bad kiwei kiwei.
La kynnoh ba u Prof Indrajit dalade, ula shna hi ia ka First Statutes, 2023 bad aibor halade ban thungkam ia kino kino ki briew khlem da iaid kat kum ka lynti hynrei tang da ka mon jong u, kaba la ailad ia u ban pyndonkam bakla ia ka bor ban iohleh ia ki kam thok kam shukor.
La kynnoh ba u Prof Indrajit ula thungkam haduh 6 ngut ki kynthup ba kynthup ia 3 ngut ki Prof. of Practice, 1 (uwei) Associate Prof. in Residence bad 2 ngut ki Prof. in Residence halor ki jingshemphang jong ki ha ki lain bapher bapher ki ban iarap ia ki samla pule. Kat kum ka RTI, kine ki briew ki hap ban ai jinghikai haduh 20 kynta ha ka shibnai la ka dei markhmat ne na shajngai hynrei ka Seng kala shem ba naduh ba u rungkam, napdeng ki 6 ngut, tang 2 ngut ki professor ula shim klas kata ruh kaba long haduh ka por bala buh bad 4 ngut kim pat ju shim klas satia.
Hynrei kila professor kila sei ia ka tulop bad kiwei kiwei ki jingmyntoi khlem da synniang eiei sha ki samla pule. Ki 3 ngut ki Prof. of Practice bala thung da u Prof. Indrajit Dube naduh u Nailur, 2023 kila wanrah ia ka jingpynlut ba kot haduh T. 46,83,500 kum ka tulop/honorarium ka kot T. 1,50,000/- shibnai bad T. 8,26,301 kum ka baileit baiwai bad kiwei ki jingpynlut kata ruh khlem da wan shimklas ne ai jinghikai ia ki samla pule.
“Kane ka dei ka kam bamsap kaba la shai kdew bad ka jingpyndonkam bakla ia ki samla pule bad ia ka spah ka Jylla ia kaba ym lah ban shu ieh khlem ka jingpynsajia” ong u samla Donald.
