Shillong, Jymmang 04 : Ka sorkar Meghalaya kan sa phah ïa ki bor pahara kaba khlain naduh ka sngi Palei sha ka shnong Lapangap ban pyntikna ba ki nongrep ka shnong Lapangap ki lah ban leit rep leit riang khlem ka jingshahpynthut.
Kane ka dei ka jingkular u Symbud Myntri Rangbah Bah Sniawbhalang Dhar ha ka sngi Balang hadien ka jingwan tur da ki spah ngut ki nongshong shnong ka Lapangap sha Secretariat ban dawa ïa ka jingïada hadien ka jingkynnoh ba jur ka jingpynthut ki Karbi.
“Ngi la ioh ia ka jingïakynduh kaba seisoh bha. Nga la ai jingkular sha ki ba ka sorkar kan leh katba lah ban ïada ïa ki briew jong ngi bad ban pyntikna ba ka jingsuk kan neh kumba ju long,” ong u Symbud Myntri Rangbah Bah Sniawbhalang Dhar hadien ba dep pynïaid ïa ka jingïalang.
Ia kane ka jingwan tur paidbah la ialam da ka Dorbar Shnong ka shnong Lapangap bad la kyrshan da ki katto katne ki kynhun Sengbhalang.
“Ki paidbah jong ka shnong Lapangap bad katto katne ki Sengbhalang ki la ïakynduh ïa nga halor kane ka kam. Ha ki khyndiat sngi ba la dep, kila mih ki jingjia ha ka thain. Ka dei ka samoi ba ki nongrep ki la sdang ïa ka rep ka riang, hynrei la don ki jingpynthut na ka liang ki Karbi,” ong u Symbud Myntri Rangbah.
U la pynshai ba ka jingïakren kam shym long halor ka kam pud bad ka jylla. “Ka jingïakren mynta ka sngi kam dei shaphang ka kam pud. Ngi la ïakren shaphang ka kamai kajih jong ki ha ka shnong Lapangap…. Ka kam pud ka dei ka kam ban shim ha ka kyrdan jong ka jylla,” ong u Bah Sniawbha.
“Ki (ka kynhun) ki la wan ban kyrpad ïa ka jingtuklar namar katto katne ki Karbi ki la pynthut ïa ki, bad ngi la ai jingkular ïa ki ba ngin phah ïa ka bor pahara kaba khlain naduh lashai ban pyntikna ba ka rep ka riang kan ïaid beit khlem kano kano ka jingpynthut,” u la bynrap.
Haba la kylli la ka Jylla ka iakren ïa kane ka kam bad ka Assam, u Bah Sniawbha u la ong, “Shynna, ngi la ïakren ia ka. Ki Deputy Commissioner na baroh ar liang kin sa pynlong ia ka jingïakren — ki la dep kiaren ha ki sngi ba la dep — hynrei dang donkam shuh shuh ia ki jingïakren. Namar ka Assam ka la thaw ïa ka sorkar kaba thymmai, u Myntri Rangbah jong ngi u la ong ïa nga ba un sa iakren ïa kane ka kam bad u Myntri Rangbah jong ka Assam.”
“Namar kane ka jaka ka don ha khappud, ngi dang ap ïa ka sorkar Assam ban thung ïa u chairman thymmai jong ka regional committee na ka liang jong ki. Ynda la dep kata, ngin sa rai bad ïakynduh ïa ki paralok jong ngi ha ka por kaba biang,” u la ong.
“Ngi la ai jingkular ïa ka kynhun ba wan Lapangap ba ngin sa phah ïa ka bor pahara kaba khlain khnang ba ki kam jong ki kin ym shah pynthut,” ong u Bah Sniawbha.
“Kila don lypa ka jingdon hangtei, hynrei donkam ban phah shuh shuh ia ki bor pahara. Namar kata ngin sap hah shuh shuh ïa ki Pulit ban pyntikna ïa ka jingshngain bad ka jingïada jong ki briew kiba shong ba sah ha khappud. Ngin phah ia ki Pulit kat kum ka jingdonkam,” u la bynrap.
Ha kaba kren sha ki nongthoh khubor hadien ka jingïalang, u Assistant Rangbah Shnong ka shnong Lapangap Bah Samkhih Situng u la ong ba ka jingdawa kaba hakhmat eh jong ka shnong ka dei “ban ai ïa ka jingïada ba pura ïa ki nongrep jong ka shnong Lapangap.”
“Ngi la iashong jingïalang bad u Symbud Myntri Rangbah Bah Sniawbhalang Dhar, bad u la ai ka jingkular ïa ngi ba naduh lashai, ki nongrep jong ka shnong Lapangap ki lah ban bteng ïa ka jingleit rep leit riang,” ong u Bah Situng.
“Kumba ngi la pynpaw ha ka jingïalang, lada ka jingkular jong ka sorkar kam treikam, ngin sa nang shim ïa ki sienjam kiba bud ban pyntikna ïa ka jingïada na ka bynta ki nongrep jong ngi katba ki dang leit ban rep ban riang,” u la bynrap.
Haba batai ïa ka jingpynthut ba la mad da ki nongshong shnong, u Bah Situng u la ong, “Ngi mad ïa ka jingpynthut man ka por. Ngi rep ha ka khyndew jong ngi bad leh ïa ka jinglur, hynrei ki briew na ka liang ki Karbi ki la wan ha ka por mynmiet ban pynjot ïa ki pynthor jong ngi. Kata ka dei ka jingpynthut ba ngi la mad.”
“Ngim pat sngewhun 100 percent, hynrei 95 percent ïa ka rai jong ka sorkar. Ngi kyrmen ba ka sorkar kan shimkhia bha ïa ka kam Lapangap bad kan ai ïa ka jingïada kaba biang khnang ba ngin lah ban leit rep laitluid. Ngi kwah ïa ka jingpynbiang bor pahara ba pura, kynthup ïa ka kynhun SF-10,” u la ong.
“U Inspector General bad u Superintendent of Police ka West Jaintia Hills, ki la don lang ha ka jingïalang, bad ki la ai jingkular ïa ngi ba naduh lashai, yn phah ïa ka bor pahara kaba khlain ban ai ïa ka jingshngain bad ka jingïada ïa ki nongrep Lapangap,” bynrap u Bah Situng.
