Shillong, Lber 03: U Symbud Myntri Rangba ka Jylla Bah Prestone Tynsong ha ka sngi Nyngkong ula kular ba ka Sorkar kan sa shimkhia bha ban bishar ia ka jingtyrwa ban pynkhla ia ka Laskein Civil Sub-division.
Haba jubab ha Iingsorbar, u Bah Prestone ula ong ” Kam don satia kano kano ka jingbuhpor hynrei ailad ia ka Sorkar ban shong bishar ia ka jingtyrwa. Ngin sa shong bishar bha ia kane ka kam.
U MLA ka Mowkaiaw Bah Nujorki Sungoh ula pynpaw ia ka jingsngewkhia ba ka Sorkar kala ai ia kajuh ka jubab ia ka jingkylli jong u naduh u snem 2018.
Haba pynshai ia kane, u Bah Prestone ula ong ” balei ba nga jubab ba ka kam kala don ha ka jingbishat, ka dei namar ka jingpynkha ia ka Civil Sub-division lane District ka dei kaba hap ban da bishar bha da ka Sorkar bad kham tam eh ka iadei kam bad shibun ki Tnad. Ha ka jingshisha ha u 2021, ngi la dep thoh shithi sha baroh ki Tnad ba kin ai ia ki jingtip ba bniah ban pynkha ia ka Civil Sub-division bad katto
katne ki Tnad kila ai ia ki jingpynshai hynrei bun na ki, kim pat aiti satia ia ka kaiphod.
“Ia kine ki kaiphod yn sa phah sha ka Standing Committee hapoh ka jinglong chairman u Chief Secretary bad ka Committee kan sa wanrah sha ka Sorkar ba kan shim ia ka rai ba khatduh” ula bynrap.
Shuwa kane, u Bah Nujorki ula ong ba ka Laskein kala pyndep ia baroh ki jingdonkam ban pynkha ia ka Civil Sub-division bad thymmai namar ka don haduh 1.25 lak ki nongshongshnong kat kum ka jingpynrung kyrteng Aadhaar, 15000 tylli ki longiing bad ka don ia ka jaka ba heh 500 sq kms.
” Nga Kyrmen ba ka Sorkar kan sngap ia ka jingud jong nam jong ki paidbah ka Laskein ban ai ia ka Civil Sub-division” ula bynrap.
