Shillong, Rymphang 17 : U Myntri ka Koit ka Khiah Bah Wailadmiki Shylla ula kubur ia ka jingduna jong ki doktor bad ki nos ha ki katto katne ki hospital Sorkar, haba kdew ia ka daw na ka jingnang bun ki nongpang ha kine ki lai snem bala leit.
Haba jubab ia ka jingkylli ha Iingdorbar Thaw Ain ha ka sngi Ba-ar, u Myntri ula ong “Ka don ka jingduna ki doktor bad ki nos ha ki katto katne ki hospital Sorkar bad ha kajuh ka por kala don ka jingkiew kaba jur bha ha ka jingwan sumar ki nongpang ha ki hospital Sorkar ha kine ki lai snem bala leit noh bad mynta u snem”.
Ula bynrap ba ka Directorate of Health Services (MP) kala pyntreikam ia ki kor peit bniah lyngba ka dashboard ban leh eiei halor kane ka kam.
