Shillong, Iaiong 14 : U Director General of Police (DGP) LR Bishnoi hynne ka sngi thohdieng, ula pynpaw ba ka Tnad Pulit kala shem jingeh ban tehlakam ia ka jingkhaii dewiong beain ha Jylla namar ka jingduna ki Pulit ban buh pahara ha manla ki jaka ba iaid ki kali dewiong.
U DGP ula ong ba ka Tnad Pulit kala shim ia ki sienjam ban pynbeit iala ki jong ki jingbakla, kiba la kdew ha ka iingkasahri Meghalaya High Court haba phai sha ka jingkhaii beain ia u dewiong ha Jylla.
Hynrei ula ong, ba ka long kaba eh ban pahara ha manla ki jaka jong ka Jylla namar ka jingduna jong ki bor Pulit.
Kat kum ka jingong jong u, ki Pulit kila pyrshang ban pynbiang pahara ia ki lynti iaid kiba don ka jingkhaii tuh ia u dewiong.
Halor ka shongsuk shongsain, u DGP ula ong ba ka shongsuk shongsain ka long kaba jai jai haba pynpaw ba ka Tnad kala ioh ia ka jingkyrshan ba pura na ki paidbah.
