Shillong, Aug 16: U Myntri Rangbah ka jylla u Conrad K. Sangma hynnin ka sngi ula kren halor ka jingim jong ki nongseng kam lajong bad ki nongioh jingmyntoi na ki sienjam jong ka sorkar bad kane ka jingkren ka jong u ka long kaba phylla bad ka bym ju jia koit ha ka histori jong ka Meghalaya kaba u Myntri Rangbah yn kren kyrpang ha ka jingrakhe iaka sngi laitluid ka ri ne Independence Day.
Haba kren ha ka jingialang ha madan Polo ha kanjingrakhe iaka Independence Day kaba 77, u Conrad Sangma ula ai jingithuh ia ka jingseisoh jong ki riewshimet kiba la kiew shaphrang ha kiba bun ki liang.
Kane ka sienjam da ka kadei da ka jingthmu ban burom bad ban rakhe ia ka jinjop jong ki nongshong shnong ka Meghalaya bad kumjuh ban pyni ia ki jingmyntoi jong ki prokram bad ia ki jingshimkhia jong ka sorkar, kaba pyni ruh ia ki jingkular jong u Conrad Sangma ha kaban kyntiew ia ki sap ki phong jong ki khynnah bad ki samla bad ban ithuh ia u synniang u jong ki.
Ha ka por ba u ai jingkren u Myntri Rangbah ula shim ia ka por ban kdew ia ki katto katne ki nongseng kam lajong, ki nongioh jingmyntoi bad kumjuh ia ki khynnah shynrang bad kynthei na ka Athletics kiba la shah jied lyngba ka STAR Programme ha kaba ka rukom ialehkai ka jongki ka iahap kyrdan bad ki nongialehkai na kylleng ki ri.
Ki kyrteng kiba u Myntri Rangbah ula kdew ki kynthup ia u Everroy Myrsing uba dang 19 snem na East Khasi Hills, uba la mareh ia ka 20 meter tang hapoh ka 2.7 sekhon bad kane ka kahm sted shuh shuh ban ia baroh ki nongialehkai ha ka Norway Division One Football League.
2. Ka Kasanchi Donesha Marak, 13 snem na South Garo Hills, kaba pyndep iaka 10-meter Ladder Run hapoh ka 2.43 sekhon, kaba la pynlong ia ka kum ka nongmareh kaba tbit ha katei ka kyrdan jongka rta jongka.
3.Fabian Marbaniang uba na West Jaintia Hills udei uba don ia la sap kum u Black-Terracotta Artist.
4.Stamina G. Sangma na South West Garo Hills uba tbit bha ha ka kam shna ia ki khiew khyndew bad ki mawblok.
5.Blastin T Sangma na South Garo Hills, uba la pawnam ha ka kam thain da ki siej.
6.Ibalarihun Mallai na Ri Bhoi, kala plie ia la ki dukan ha Shillong ban die ia ki jain Eri Silk kiba bha tam ha ka pyrthei.
7.First Colour Lathong, 19 snem na West Jaintia Hills uba la pynshohbiej ia ki paidbah ha ka 2022 Annual Youth Summit da kaba tem ha ka juh ka por ia ka Guitar, Harmonica bad Tambourine.
8.Rida L. Nonglait na Eastern West Khasi Hills, kaba la pyni iala ka sap ha ka tem ka put ha ka 2022 Annual Youth Summit.
9.Fastrossing Kharsyntiew bad Pynshaibor Wahlang ki khynnah pule na West Khasi Hills kiba don ia ka mynsiem ban kyntiew ia ka rukom im ha ka imlang sahlang lyngba ka jingstad saian da kab leh ia ki experiments bad prototypes.
10.Prindilla Shira 35 snem ka rta kaba la don khun na ka shnong Silki, North Garo Hills, kala ioh ia ka jingsumar ha ka PHC hadien ba kala mad ia ki jingeh ban ioh iaka jingsumar ha ka por ba ka khakhun kham hashwa. Kala kha hi ia baroh 4 ngut ki khun hala iing namar ba ka PHC ka jngai 7 km na ka shnong jongka.
11.Khrawborbha Kharpuri uba pyniaid ia ka chicken wagon ha Shillong ha kaba ula aikam ia ki 18 ngut ki briew bad kumba 100 ngut ia kiwei pat kiba don bynta lang.
12. Andrina and Dashembha Thabah kiba pyniaid ia ki 3 tylli ki jaka die juti ha Pynthor, Police Bazar bad Laitumkhrah bad ki aikam ia ki 18 ngut ki briew. Ka jingiohkamai ka jong ki ha u snem 2020 ka long T.50 Lak hynrei mynta kala kiew palat iaka T.2 Klur ha ka shi snem.
13.James Evantis Dkhar na East Khasi Hills, u nongsengkam lajong ha kaba iadei bad ka Handloom uba la seng nyngkongeh eh ia ka ‘Flying 8 Loom’ training centre ha ka ri.
Ha ki snem ba mynshwa u James udei uba la iehnoh ia ka jingpule bad u nongniah taksi kamai hynrei mynta udei u master trainer uba la ioh jingithuh ha ka weaving, organic dyeing bad product diversification.
14.Coretta Sangma na West Garo Hills tang na ka jingsngewtynnad ia ki kam thain jingthain kti kala seng ia ka dukan ha Tura ban pyniaid iew ia ki.
15. Ridahunshisha Lynshiang na Pongtung, Pynursla block, East Khasi Hills, ka leit ha man la ki shnong kiba don ha katei ka thain ryngkat bad ki tiar e-POS ban pynsngewthuh ia ki paidbah halor ka financial literacy camp, pynioh ram, pynsam ia ka pisa bad ban pynplie ia ki Account bad ban pynrung kyrteng iaki nongioh jingnyntoi lyngba ka social security schemes. Na kane ka kam jongka jingtrei shitom kala ioh iaka tulop kaba kot
T. 19,000 ha ka shi bnai.
Kane ka jingkren kyrpang u Myntri Rangbah kala long kaba kham pher bha ha kaba ym shim la rakhe tang iaka jingjop jong kitei ki riewshimet hynrei kala long ruh kum ka rynsan ban pynshlur bad ai mynsiem ia kiwei pat bad ban ithuh ia ka sap ka phong ki bapher bapher.
Pule lang ia kane: Rakhe ka Meghalaya ia ka I-Day hapdeng ka jingshongkun, sam u CM ia ki khusnam bapher bapher
