Shillong, Jylliew 28 : Ka mukotduma Public Interest Litigation (PIL) ba iadei bad ka jingiakajia halor ka krem Mawjymbuin ha Mawsynram, East Khasi Hills, la phah noh mynta ban bishar da ka Single Bench jong ka Iingkashari Meghalaya High Court ban lah pynbeit noh.
Ha ka hukum ba pynmih hadien ba pynwai ia ka mukotduma, ka Iingkashari Division Bench ba kynthup ia u Justice IP Mukerji bad Justice W Diengdoh kala ong “Ngi tharai kan biang bad iahap ba ia kane ka PIL la phah noh sha ka Iingkashari u Single Judge ha ka WP (C ) No.275 of 2024. Ngi hukum ia kane. Naba ka dei ka jaka lehniam bad ktah ia ka jingsngew niam, la kyrpad ia u nongbishar ban pyrshang ha kabna pynbeit noh ia kane ka kam da ka jingiasngewthuh jingmut lang lyngba ka jingiakren/jingiapynbeit”.
Kane ka krem, kaba don ia u maw ba ngeit da ki katto katne kum u “Shiva Linga” kala kylla long ka jaka lehniam ba kongsan, kaba la khring ruh ia ki ba bun ki riewngeit ban leit leh puja.
Hynrei, ka jingiakajia kala mih halor ka jinglong trai ia kane ka krem, ha kaba katto katne ki Khasi trai shnong kila kam ba la ai bakla sha ka Seng Khasi Hima Mawsynram, Mawsynram Syiemship.
Ki nongdie ia katei ka jaka kila lei tai mukotduma hakhmat ka Iingkashari District Council, Khasi Hills, Shillong, ba kwah ban pynbna ba ka jingiateh kular ba 14 tarik Jymmang, 2015 ka dei ka bym treikam. La kynnoh ba kam shym la don satia ka jingaiti ia kane ka nongkynti.
U Nongmudui, bala wan mih hi dalade, ula iasaid ba ka Iingkashari District Council kam don bor satia ban tian bishar ia kane ka mukotduma, haba kdew ia ka hukum jong ka Iingkashari Supreme Court bad ka Meghalaya High Court.
Hynrei, ka Iingkashari ka sngew ba kine ki hukum kim don jingiadei eiei bad kane ka mukotduma bad kala shaniah ha ka sub para (1) jong ka para 4 jong ka Schedule six ka Riti Synshar ka Ri India, kaba aibor ha ka Iingkashari District Council ba kan tian bishar ia ki mokotduma ba iadei bad ki Scheduled Tribe.
Haba peit ia ka jingiasyriem ki kam, ka Iingkashari kala phah noh ia ka PIL sha ka kashari u Single Judge uba dang bishar ia ka writ petition (WP (C) No. 275 of 2024) ba iadei bad kane hi ka kam.
Kala ong ba lada ka jingiakren iapynbeit kam poi shano shano, ka Iingkashari kala ai jingmut ia u Single Judge ban phah noh ia kane ka mukotduma sha ka Iingkashari District Council ba kan tian bishar. Ka Iingkashari District Council, kan shim ia ka jingbishar ia kane ka kam tad hadien bala sangeh bishar u Single Judge.
 ba iadei bad ka jingiakajia halor ka krem Mawjymbuin ha Mawsynram, East Khasi Hills, la phah noh mynta ban bishar da ka Single Bench jong ka Iingkashari Meghalaya High Court ban lah pynbeit noh.){kind=link}