Kyntu ia ka NEHU, MCTA bad NEHUTA ban iapynbeit noh ia ki jingiapher jingmut
Shillong, Nailur 06: Kumba 99 percent ki College hapoh Meghalaya kila mynjur ban pyntreikam noh iaka National Education Policy (NEP) 2020 bad ka jingiakren ka dang iaid shakhmat ban iawer sa ia kiwei ki College ban bud ia kane ka juh ka lynti.
Ia kane la pyntip da u Myntri ka tnat pule puthi Rakkam A Sangma haba kylli halor ka jingiapher jingmut hapdeng u Vice Chancellor ka North Eastern Hills University (NEHU) bad ka Meghalaya College Teachers Association lem bad ka NEHU Teachers Association (NEHUTA).
“Ka NEP ka dei ka sobjek kaba iar bha bad kane ka jingpule ba 4 snem jong ki samla pule Under Graduates ban pyniaid daka NEHU naka bynta baroh ki College hapoh Meghalaya bad 99 percent ki College hapoh ka jylla kila iaid shakhmat ban pyntreikam iaka NEP bad ki Classes ruh kila sdang “ ong u Rakkam.
U Rakkam ula iathuh ba ka sorkar jylla bad ka NEHU kala dep iakren bad ki Principal bad ki bor pyniaid jong ki College ban pynthikna ba ka jingpyntreikam iaka NEP kala iaid beit iaid ryntih.
Halor ka jingiapher jingmu hapdeng u VC, ka MCTA bad NEHUTA, u Myntri ula ong “Ka lawei jong ki samla pule ka kham kongsan ba ia kiwei pat.
U Rakkam ula iathuh ba haki por bala dep, ki College kila thoh sha ka sorkar ba kim pat kot bor ban pyntreikam iaka NEP bad ka sorkar jylla ruh kala thoh shaka NEHU ba ki College kim pat long kiba la pynkhreh hynrei hadien bala iathir sani bha, jan baroh ki College hapoh ka jylla kila mynjur ban pyntreikam iaka NEP daka buh iaka lawei bad ka jingbha jong ki samla pule hakhmat duh.
“Hooid ki lah ban don ki jyrwit jyrwat lane ka jingiapher jingmut shimet. Ka sorkar ka kyntu bad ka kyrpad iaka NEHU bad iaka MCTA bad NEHUTA ban pynbeit noh ia kine ki kynrum kynram namar haduh mynta wat ki samla pule, ki Principal bad ki Management jong ki College kim don ka jingpyrshah ban pyntreikam iaka NEP” ula ong.
