Shillong, Nohprah 12: Ka Meghalaya Adventurers’ Association (MAA) kala pynlong ia ka jingiarung krem ha ki krem ba thymmai hapoh kane ka Ri ki Lyoh (Meghalaya) lane ka ‘Caving in the Abode of the Clouds Expedition’ naduh 6 tarik Naiwieng haduh 1 tarik Nohprah 2022 hapoh ka shnong Jalaphet, East Jaintia Hills.
Ia kane jingrung krem la pynlong ha ki 5 tylli krem ba kynthup ia ka Krem Poh Bhang, Krem Mo Ryho kiba don hapoh ka shnong Kairang, East Jaintia Hills.
Kane kadei ruh kum shi bynta ban rakhe iaka jingdap 30 snem ka jingiaid lynti ka MAA ban wad iaki krem bad kadei ruh kum shi bynta ban rakhe iaka jingdap 100 snem ka Siju Dobhakol jong ka kynhun Kemp bad Chopra ha u snem 1922.
Kane ka sien rungkrem ba 29th jong ki kynhun nabar ri (International Caving)’ ka kynthup ia 19 ngut ki nongrung krem na United Kingdom, Ireland, Austria, Netherlands, United States bad na India kiba la iasnoh kti lang bad ka Meghalaya Adventurers’ Association.
Ha kane ka jingrung krem ki stad rung krem kila leit sha ki thain Muallian ka East Jaintia Hills bad ha kane ka krem kila lap ruh ki krem thymmai Krem ETB, bad ka Krem Rynjang (Ret Dung Khur bad Krem Pynnoh Um Sngad.
Ki nongrung krem kila nang ngam shuh shuh ha ka krem Pynnoh Um Sngad naka 4,131m haduh 5,295m bad la pyniasoh bad ka Krem ETB kaba la ngam haduh 7,138m bad kane ka pynlong ia kane ka krem kum ka krem ba 9 na ki krem bah jrong tam hapoh ka ri India.
Ki Nongrung krem kila nang ngam ruh ha ka Krem Rynjang na ka 11,558m haduh 16,328m bad kadei ruh ka krem ba 7 na ki krem ba jrong hapoh India.
La sngewthuh ba ka Krem Pynnoh Um Sngad-ETB bad ka Krem Rynjang ki lah ban nym iasnoh bad naka liang ki stad rung krem kin pynlong biang iaka jingwad bniah ban lap shuh shuh iaka jingshisha namar la sngewthuh ruh ba kine ki krem ki lah ban kham heh ban iaka krem Krem Liat Prah-Um Im-Labit kum ki krem ba heh tam hapoh India.
Kat haduh u snem 2022, la dep ban lap palat 1700 tylli ki krem kiba don ha Jylla Meghalaya bad na ka liang jong ki nongrung krem kila dep ban rung haduh 1000 tylli . Tang ha une u snem 2022, ki nongrung krem kila rung bad buh jingthoh (map) haduh 13.35 Km ki krem thymmai ha Jylla.
“Da kane ka jingrung krem ba mynta, ki stad rung krem kila dep ban thew bad map haduh 531 km ki krem hapoh Meghalaya bad kan nang don ruh ka jingbteng ban iai thew ia kine ki krem hapoh ka jylla. Kane kan pynskhem kum ka thain ba bun krem tam hapoh ka Pyrthei” la ong u bah Kharpran.
Naka liang u bah Kharpran u la ong ba ka Meghalaya Adventurers’ Association ka ai khublei kyrpang iaka tnat Directorate of Sports & Youth Affairs bad ia ka Meghalayan Age Limited halor ka jingkyrshan ban bteng ban wad bniah ia ki jait krem hapoh ka jylla.
