Shillong, Nailur 08: U Nongialam ka Congress Bah Ronnie V Lyngdoh hynne ka sngi palei, ula kob ia ka National People’s Party (NPP) ban mih noh na ka kynhun synrop National Democratic Alliance (NDA) bad ka North East Democratic Alliance (NEDA) lada kala rai ban nym iatreilang shuh bad ka Bharatiya Janata Party (BJP).
“Phi (NPP) ong ban nym iatreilang shuh bad ka BJP hynrei ha ka thain Shatei Lam Mihngi, phi dang don hapoh ka NEDA bad ha Delhi phi dang don hapoh ka NDA” ong u Bah Ronnie uba dei u MDC ka Congress na Mylliem, haba iakren bad ki nongthoh khubor.
“Lada phim iatreilang shuh bad ka BJP, hangne ha ka thain, weng noh na ka NEDA bad ha Delhi weng noh na ka NDA bad ki paidbah kin sa ngeit ia phi. Kumba don ba ong ba ki paidbah kim biej shuh bad kila stad bha ban bishar na ki jingkren” ula bynrap.
U Bah Ronnie ula kynthoh halor ka jingkren sain pyrthei ba dang shen ha kaba ka NPP kala kam ba kan nym iatreilang badka BJP ha u snem 2023 bad ka BJP ruh ka ong ba kan weng noh ialade na ka Sorkar MDA.
Haba ong ba kine ki drama ki dei tang ban pynbiej ia u paidbah ka Jylla, une u MDC ula ong “hynnin, ki ong ba baroh ki MLA kila don bad ka BJP ban weng noh naka sorkar MDA hynrei mynta ngi pule ha ki kot khubor ba uwei u MLA ka BJP uba dei u Myntri Sorkar ula ong ba ngin ym weng. Kane ka dei tang ka jingpynbiej ia ki paidbah”.
“La jan san snem phi la iatreilang bad ka BJP bad haba ka elekshon kala wan artad,phi kwah ban pynbiej ia ki paidbah ba phin ngim don lang bad ka BJP. Wat pynbiej ia ki paidbah. Wat khein bein iaka jngstad u paidbah. Wat khein dewthala ruh iaka mon u paidbah” ula ong.
Une u MDC ula pynkynmaw ruh ba ka MP ka Tura ka Agatha Sangma kala ai ia ka jingkyrshan ba pura ia ka Citizenship Amendment Act (CAA) ha Iingdorbar Parliament bad ong “Ki kam jong ki, ki kren kham jam ban ia ka ktien”.
U Bah Ronnie ula kynnoh ruh ba u Myntri Rangbah ka Jylla un pan jingmut na u Myntri Rangbah ka Assam uba dei u Chairman ka NEDA ha kiba bun ki kam. “Ta ka daw, sangeh noh ka jingpynbiej ia ki paidbah namar ha u 2023, kin sa ai ia ka rai” ula ong.
