Shillong Kyllalyngkot 23: Ka BJP Meghalaya hynne ka sngi baar, kala kynthoh pyrshah ia u nongialam ka seng Congress u Rahul Gandhi bad ong ba ki jingkren ki jong u ki dap da ki jingshukor jingpynbeij haba kob ba yn pynshisha ia ki jingkren jong u ha ka jingialang paidbah ha Nongpoh.
“Ngi kylli ia u Rahul Gandhi ban pynshai ha kano ka dur ba ka jinglong, ka history, ka rukom im rukom sah ki nong meghalaya ka shah thombor, ka BJP ka lah ban pynshai iaki kam kaba kala leh naduh tynrai ha ki rukom bapher bapher lyngba ki morcha ka party ban kumno kin lah ban iarap iaka imlang ka sahlang bad ban kiew ki paid Meghalaya, ym dei ba ngi kawang ktieh ia ka party congress kaba lah synshar iaka ri jong ngi kumba 40 snem eiei” la ong u Sabyasachi Ghose, Convenor ka State Media Cell BJP, Meghalaya Pradesh.
Ula pynpaw ruh ba ka BJP ka kdew ruh ruh ba ki nongkitkam ka party ka bun hapdeng ki trai muluk ka ri, ha ka district bapher bapher na sor shaduh nongkyndong ki dang ia kiew katba dang mih ki sngi, ka jingkylli ka long lada ka BJP ka dang pynjlor iaki rukom im rukom sah ki paid Meghalaya kumno ki paid naduh na sor bad na kyndong ka Meghalaya ki wan iasnohlang bad ka BJP bad lada ngi lehsniew ki nongkitkam jong ngi kin duhjait kum ki nongkitkam ka Congress.
“Ban shu pynkynmaw ruh ia u Rahul Gandhi ba iwei pa iwei ki riewshlur jong ka Meghalaya ki ioh iaka jingpynkupburom bad jingkynmaw na ki paidbah, ban shu kren noh, ngim kynmaw baka congress ka lah ju trei kumta. U Rahul Gandhi u lah kren ba ki Khasi bad ki Garo kim don ha ka Eighth Schedule tangba u klet pat ia ki NongJaintia, tang hangne u lah pynshai ba ym pat tip bha shaphang ki tynrai ki riewmeghalaya, ym don jingtip jingithuh ia ki riewpaid ka jinglong jongka ri hi baroh kawei. Ka BJP ka kwah ruh ban tip bad ban kylli ba ka congress ka lah leh aiu ha ki 60 snem ba lah dep ha ka por ba ki dang don ha ka bor synshar ka jongki ha ka ri India baroh kawei bad ha ki shnong ki thaw, balei U Rahul ym pynmih ia kita ki kyntien por ba u dang don ha ka bor, hynrei tang ki jingkylli bym don nongrim” ” ong Sabyasachi Ghose.
Ka BJP kala ong ruh, “Ha kaba iadei bad ka jingkren shaphang ka jylla Manipur, u Rahul u pynsngew kumba ka jingiakhih ka Manipur dei naduh ba synshar ka BJP, hynrei u klet ba ka iing ka sem jong u kam pat tip ne wan bha shane sha North East jong ngi ne shimkabu ban iarap. Ngi kiba dei ki nongshane ngi tip bha ba ka Congress ka khlem pynmih lad ban pynbha ne pyniasuk ia ka jingiadei shane. Ha kato ka por ngim dei ban klet ba ka congress ka don ha ka bor ha kasorkar pdeng bad ha Manipur hynrei lehnoh ei ba khlem don jingiarap na ka seng ba synshar ha kato ka por, phi lah klet ia kata Rahul Gandhi?.
Ula ong ba mynta, lada ka BJP ka wanrah ki lad jingsuk bad ban pynjem iaka jingjia ha Manipur u Rahul Gandhi u wan ai ding pynban tangba kine kidei ki rukom trei ka Congress naduh mynshuwa.
Ka BJP kala pynkynmaw ruh ia u Rahul Gandhi ba ka jingleh donbor dei ka policy jong ka Congress bad ki nongpyniaid ba hiar pateng kumjuh, hynrei ka BJP ka ngiet skhem ba ka jingiatrei bad ka jingiadei jongka sorkar pdeng bad ka sorkar jylla e hi kumjuh kalah wanrah jingphuh ha ki rukom treikam bapher bapher ha ka ri North east hi baroh kawei.
