Nongstoiñ, Naitung 18: Ki paid nongrep sying, kila phuhmut phuhmat biang mynta da ka jingkiew dor biang jong utei u marrep, kaba la kot sha ka T.4000 shi mon.
U bah Swingly Samakha uwei na ki nongrep sying ka thaiñ Langpih, u la ong ba naduh u bnai Nohprah jong u snem ba la dep, ki nongrep sying ki la khuslai jingmut bha, namar ki nongkhaїi na Assam ki thied tang ha ka dor shi hajar san spah haduh ar hajar tyngka shimon. Hynrei naduh u bnai Jylliew ba la dep ka dor jong utei u mar rep ka la sdang kiew suki suki bad ka lah ban ban kiew shuh shuh.
U la ong ruh ba u sying, u synsar, kwai tympew bad ki jait soh ba bun jait ki dei ki mar rep ba kognsan eh jong ki paidbah nongshong shnong ka thaiñ. Na kitei ki mar rep, ka їew synsar ka dei kaba shet kylla palat їa ki nongrep, namar ha ka shi taїew ka dor ka lah ban kylla lai haduh saw sien.
Don teng teng ba ka їew synsar ha ka por mynstep ka long da kumwei bad ynda janmiet pat ka la kylla da kumwei. Hynrei ka dor sying pat shisien ba ka la sdang ban kiew ka kiew suki jai bad ka neh hynrei don pat ki snem ba lada ym don їew wat tang u nongthied ruh ym don. Nalor kata u la ong ba na ki jait mar rep baroh ba ki paitbah ka thaiñ ki rep u kwai u dei u mar rep u ba biang palat namar ka dor ka kiew man la u snem.
U bah Samakha u la ong ruh ba wat la ki paitbah ki la sdang ban їabeh ban rep kwai, hynrei na ka jing sdang jong ka khlam kwai, ki nongrep kwai ki la sdang ban artatien namar lada ki rep ruh lada jia ba ka wan ka khlam, kan wan rah їa ka jingduh kaba khraw.
U la ong ruh ba naduh ki snem ba la dep ka khlam dieng kwai ka la sdang na ki thaiñ Upperlangsah, Noonmati, Domjaraiñ, ki shnong ha ka thaiñ Tynghor bad ka la pur ter ter sha ki thaiñ Sohmarang, Nongsohram ki shnong kiba don shaphang shatei na Langpih bad ka la pynartatien shibun їa ki nongshong shnong ba kin rep kwai.
