Nongpoh, Naiwieng 29: Ka Petroleum Dealers Association of Meghalaya (PDAM) bad ka Meghalaya Indane Distributors Association (MIDA), ki la pynpaw ia ka jingkmen halor ka jingshimkhia jong ki bor ka sorkar Meghalaya halor ka rai jong ka North East Petroleum Mazdoor Union ban pynpoi umphniang (petrol/diesel) shapoh Meghalaya tang hadien ki katto katne ki jingjia ba la jia ha ki khyndiat sngi.
Lah ban kdew, ba dang ha ka 24 tarik ki bor pulit ka Meghalaya Police ki la pynlong ia ka jingkhynra naphang ia ki jaka pynlang umphniang beain kiba don ha u surok bah NH-6 ha Ri Bhoi District bad kem ruh ia ki briew ba donkti.
Namar kane, ka NEPMU kala phah ia ka shithi sha ka Sorkar Jylla ba pyntip ia ka rai ban sangeh pynpoi umphniang naduh ka 29 tarik Naiwieng haba iathuh ruh ba wat ka Mazdoor Union kala pynpaw ba ki nongniah kali kit umphniang kila sheptieng ban wan sha Meghalaya namar ka jingshah thombor ha ki Pulit.
Haba kren bad ki Nongthoh Khubor, u Bah Kennedy Khriam, President ka PDAM bad u Bah BL Blah, President ka MIDA, ki la ai khublei kyrpang ia ki bor ka sorkar Meghalaya kiba la lah ban pynlong ia ka jingiakynduh kaba seisoh hapdeng ki dkhot jong ka Mazdoor Union ha ryngkat ki kompani IOCL, BPCL, bad ki trai petrol pump jong ka jylla Meghalaya ha kaba lah ban shim ia ka rai ban weng noh ia kane ka jingthmu sangeh pynpoi umphniang shapoh ka jylla Meghalaya.
Ki la iathuh ruh, ba ha kane ka jingialang ba la long ha Nongpoh, ka la don ka jingiatai kaba seisoh ban pynurlong ia shibun ki jingdonkam jong ki nongniah bad ki nongbud ia ki kali kit umphniang ba ki deihok ban ioh nalor kiwei kiwei ki jingiakren kiba lah ban pynhun ruh ia kiba bun tylli ki mat.
Ha kaba ia dei bad ka jingkhynra naphang ki pulit ka Meghalaya ia ki jaka pynlang Umphniang ha Ri Bhoi District, kine ki nongialam ki la pynpaw shisha ia ka jingsngewkhia kaba jur halor ka jingdon jong ki kynhun nongtuh umphniang hapoh ka jylla kaba la wanrah shikatdei ia ka jingduhnong ia ki trai petrol pump kiba ju thied da ka hok ia ka umphniang na ki kompani.
“Ka long kaba beain shisha ia kito kiba donkti ban shu tuh ia ka umphniang kaba la thied hok da ki trai petrol pump ha ryngkat ka jingbud beit ia ka jingpyniaid ka sorkar namar ka umphniang ka dei kaba don jingma haduh katta katta namar ka lah ban bthei ha kano kano ka por”, ong ki nongialam da kaba bynrap ruh, ba halor kane ai ka ain hi kan bishar bniah namar ka jingtohkit ka la sdang hadien ka jingkhynra da ki pulit kaba la dep dang ha ki khyndiat sngi.
