Shillong, Nailur 01 : Ka jingkhein kyllum lang ia ki jingduhnong da ki State Public Sector Enterprise (SPSEs) ka la klong lut ia ka spah jong ka Sorkar, kaba long ka daw jong ka jingsngewkhia namar ka jingkit kaba khia ia ka pla tyngka ban kyrshan ia ki jingtreikam jong ki.
Ka sorkar jylla ka donkam ban bishar bniah ia ka jinglah ban pynbteng ia ka jingtreikam ki SPSE bad ban bishar bniah ia kine ki SPSE la ka long ban pynbha ia ka jingmih jong ki ne ban khang dam noh ia ki jingtreikam jong ki.
Ia kane ka jingshem bad jingai jingmut la ai da u Comptroller bad Auditor General jong ka ri India (CAG) ha ka kaiphod jong ka State Finance Audit report jong u snem ba kut ha ka 31 tarik u Lber, 2023, kaba la wanrah ha ka Dorbar Synrai jong ka Iingdorbar Thaw Ain ka Jylla ba dang shu kut.
Ki don 21 tylli ki SPSE ha Meghalaya kynthup ar tylli ki statutory corporation bad 19 tylli ki kompeni sorkar (kynthup ar tylli ki kompeni sorkar bym treikam) kiba hap hapoh ka jingpeit jong ka CAG.
Ka Audit ka la shem ba ia ki por ba la buh ha kaba iadei bad ka jingai ia ki jingkhein jingdiah ym shym la bud ryntih da ki 19 ngut ki SPSE kiba ki 40 tylli ki account jong ki, ki dang sahteng.
Na ka jingïohnong baroh kaba long T.1.61 klur ba la ïoh da ki lai tylli ki SPSE kiba treikam, haduh 73.29% la noh synñiang tang da kawei ka SPSE (Meghalaya Tourism Development Corporation Limited).
Hapoh u snem 2023-23, kumba 65% (T.371.17 klur) na ka jingduhnong baroh (T.572.28 klur) ka dei kaba la duhnong da ki 14 tylli ki SPSE kiba treikam bad ka synniang kaba bun ka dei da ki ar tylli ki SPSE kiba tnad bor ding (Meghalaya Power Generation Corporation Limited bad ka Meghalaya Power Limited).
Ka CAG u la ong ba ka Sorkar Jylla ka lah ban pynsngewthuh ia ki nongpyniaid jong ki SPSE ban pynthikna ban ai ia ki jingkhein jingdiah jong ki ha ka por kaba biang.
Ha ka jingbym don ki jingkhein jingdiah ba la pynkut, ki jingkynshew tyngka jong ka sorkar ha kum kine ki SPSE ki sah shabar ka jingpeit jong ka iing dorbar thaw ain jong ka jylla.
Ka sorkar jylla ka lah ruh ban bishar bniah ia ki daw jong ka jingduhnong ha ki SPSE kiba pynduhnong bad ban shim ia ki sienjam ban pynlong ia ka jingtreikam jong ki kaba biang bad kaba iohnong, ka la bynrap.
Ka kaiphod ka la pynpaw ba hapdeng u snem 2022-23, 14 tylli ki SPSE kiba treikam, ki la mad ïa ka jingduhnong kaba T.572.28 klur haba ïanujor bad ka jingduhnong kaba T.555.90 klur jong ki 12 tylli ki SPSE ha u snem 2020-21.
Ka jingduhnong jong ki SPSE kiba treikam, ka dei eh namar ka jingduhnong kaba la mad da ki SPSE ba pynmih bording.
Ha kine ki lai snem ba la dep, ka jingduhnong baroh jong ki SPSE pynmih bording bad ki bym bym pynmih bording ka la pyni ia ka jingkiew, kaba la pynhiar ia ka jingshongdor jong ki na ka T.1,397.72 klur (2020-21) sha ka T.565.07 klur (2022).
Shuh shuh, ha u snem 2022-23, kumba 65% (T.371.17 klur) na ka jingduhnong baroh jong ka SPSE (T.572.28 klur) la noh synniang da ki ar tylli ki SPSE pynmih bording.
“Ha u snem 2022-23, 15 tylli na ki 17 tylli ki SPSE kiba treikam, ki la mad ïa ka jingduhnong kaba la lum lang haduh T.4,341.71 klur kaba long kat kum ka jingkheiñ jingdiah ba khatduh jong ki haduh ka 30 tarik u Naitung, 2023.”
Na kine, 13 tylli ki SPSE ki la mad ïa ka jingduhnong kaba kot sha ka T.572.26 klur katkum ki jingkheiñ jingdiah ba khatduh,” ong ka CAG.
Ka jingbishar bniah ka la pynpaw ba ka equity (Rs 1,164.85 klur) jong ki 7 na ki 15 tylli ki SPSE kiba treikam, ka la lut lut na ka jingduhnong ba la lum lang jong ki (T.3,057.36 klur) bad ka jingdon jingem jong ki ka long kaba ‘duhnong’ katkum ka jingkhein ba khatduh jong ki ha ka 3 tarik u bnai September haduh 000. , 2023.
Na ki 7 tylli ki SPSE kiba ka baiseng ka la lut lut, ar tylli ki SPSE kibym don pisa shuh kila ioh T.16.84 klur ha u snem 2022-23 na ka bynta ka jinglut jingsep jong ki.
Kat haduh ka 31 tarik u Risaw, 2023, 7 tylli ki SPSE kila ioh ia ka jingkynshew tyngka jong ka sorkar kaba long haduh 605.04 klur tyngka da ka equity (313.56 klur tyngka) bad ki ram ba bun snem (291.48 klur tyngka).
“Ka jingkynshew tyngka jong ka sorkar jylla ka la lut da 9.96 percent ha u snem 2022-23,” ong ka CAG.
“Ha kawei pat ka liang, ka Rate of Real Return ha kaba la pyrkhat ia ka dor ba mynta jong ka jingkynshew tyngka, ka jingkynshew tyngka jong ka sorkar jylla ka la lut da 6.24 percent,” ka la bynrap.
Shuh shuh, ka CAG ka la ai jingmut ruh ia ka sorkar jylla ban pynsted ia ka jingpynkylla ban pynduh noh ia ar tylli ki SPSE ki bym treikam.
Katkum ka kaiphod, ki ar tylli ki SPSE ki bym treikam bad kiba don ha ka jingpynkreh ban pynduh noh ki dei ki bym shym la noh synniang eiei ruh em sha ka ioh ka kot jong ka jylla bad kim shym la pyndep ia ki jingthmu ba la thmu.
