Shillong, Nailur 01 : Haduh 1747 tylli ki mukotduma POCSO ne ka mukotduma leh beijot ne thombor iaki Khynnah Kynthei, ki dang sahteng hapoh ka jingbishar ha ki Iingkashari bapher bapher jong ki District ka Jylla naduh ba treikam ka Ain haduh u Jylliew 2024.
Ia kane la pyntip da u Myntri ka Tnad Social Welfare Bah Paul Lyngdoh ha ka jubab bala wanrah ha ka Dorbar Synrai ba 5 sngi ka Iingdorbar Thaw Ain ba dang shu kut.
Haba kdew ia ki daw bapher bapher halor kane ka jingsahteng, u Bah Paul ula ong ba ki don 6 tylli ki POCSO Special Court ha ka Jylla kiba shim bishar thik tang ia ki case POCSO kata 2 tylli ha East Khasi Hills bad mar kawei ha West Khasi Hills, West Jaintia Hills, Ri-Bhoi bad West Garo Hills.
Ki Judicial Magistrate ruh kila shim bishar ia kiwei ki mukotduma ha ka Iingkashari nalor ki mukotduma POCSO hala ki jong ki jong ki District Court.
Kawei ruh ka daw ka jingslem ban pyndep ia ka jingbishar ka dei namar ka jingpynsangeh ia ka jingshong bishar namar ka jingbym wan mihkhmat da ki nong shah kynnoh, ki sakhi bad kiwei kiwei.
Ula ong ruh ba ka jingbym wan mih jong ki liang manla namar kiwei ki daw kum ka jingpang, ki eksam bad kiwei kiwei, kila nang pynjlan ia ka jingbishar watla ka Ingkashari kala shimkhia ban bishar khlem shah liang ia baroh ki liang manla.
U Myntri u pyntip ruh ba palat 894 tylli ki case POCSO la dep ban bishar kut bad la pynkut noh tad haduh u bnai Jylliew 2024.
Kat kum ka jingong jong u, ki don haduh 280 tylli ki case ba dang sahteng hapoh ka Juvenile Justice Board kat haduh u quarter ba kut u bnai Jylliew 2024. Kaba treikam naduh u Iaiong 2024 haduh u Jylliew 2024.
Halor ki daw ka jingsahteng jong u, u Bah Paul ula ong ba ka jingnang bun ki case ba donkti ki khynnah ba iatakhuh bad ka ain kala nang kynton ia ka kam jong ka Juvenile Justice Board ban lah pyndep ia ki case hapoh ka por ba dei.
