SHILLONG, Risaw 03: U Chief Executive Member (CEM) ka Khasi Hills Autonomous District Council (KHADC) bah Titosstarwell Chyne ula ong ba ka United Democratic Party (UDP) ka kloi ban pdiang ia u bah Anthony Khongwang lada u wan iasoh sha ka party.
Lah ban kdew ba haka 26 tarik Nailur u bah Anthony Khongwang, u ba dei uwei na ki nongkyrshan ba radbah jong u Symbud Myntri Rangbah ka jylla bah Prestone Tynsong ula mih noh naka National People’s Party (NPP) bad la suba ruh ba un iakhun hi haka ilekshon 2023.
U District President ka UDP East Khasi Hills bah Titosstarwell Chyne ula ong ba ka party ka kloi ban pdiang burom ym tang ia u bah Anthony hynrei wat iaki paidbah ruh naka bynta ban pynkhlain iaka party.
U bah Titos ula iathuh ba ka party kala aiti ha u MDC ka Laitkroh Langkyrdem u bah Ryngkat Lyngdem ban pyniaid iaka ilekshon hapoh Pynursla konstitwensi 2023 bad naka liang ka Circle kan sa leh iaka ba donkam.
“Haba iadei bad ka jingjied kyrtong ban iakhun ilekshon, ka UDP ka aiti beit ha ki Circle ban jied lane ban ai jingmut iano yn jied kyrtong ban iakhun iaki ilekshon” la ong u bah Titos.
U bah Titos ula ong ba ka UDP haduh mynta ka pat ioh pdiang shithi ne kyrwoh haba iadei bad ka jingkwah u bah Anthony Khongwang ban iasoh noh bad ka party hynrei lada u kwah shisha ban wan shaka party, ka party ruh ka kloi ban pdiang ia u.
