Shillong, Naitung 02 : Ka Sorkar Jylla ka long kaba la khreh ban pynlong biang ia ka jingiakren bad ka kynhun khein beain Hynniewtrep National Liberation Council (HNLC), ong u Symbud Myntri Rangbah Bah Prestone Tynsong.
U Bah Prestone uba khmih ia ka Tnad kam Pohiing, ula ban jur ba ka jingkhang ban iakren ka dang iai plie beit bad ka Sorkar ka la pynkhreh ban iakren bad ka HNLC lada ka don ia ka mon ban wan shakhmat.
“Ka jingkhang ka plie beit na ka liang jong ngi. Ka shong ha ki (HNLC). Ka shong ha ki ban rai. Lada ki kwah ban kren ia ngi, ngi long kiba la khreh” ula ong haba iakren bad ki nongthoh khubor ha ka sngi Balang.
Kane ka jingkren u Symbud Myntri Rangbah kala mih hadien ka jingwan pyndem wait ki arngut ki dkhot ka HNLC dang shen.
U Bah Prestone ula ong ba ka rai jong ki ban wan pyndep noh ka dei namar ba kila sngewthuh ba ka lawei ha kane ka seng kam poi shano shano ruh.
Ula kyntu ia kiwei ki dkhot ka HNLC ba kin iabud lang, haba kren ia ki jingmyntoi ban ioh lada ki wan im noh ha ka imlang sahlang.
“Nga kyntu ia kiwei ki dkhot ruh ba kin iabud lem ia kane ka sienjam jong kine ki arngut, kiba la wan pyndem dang shen hakhmat ki Pulit” ula ong.
Halor ka jingbyrngem ka HNLC ia u trai ka Economic Pharmacy, u Bah Prestone ula kular ba ka Sorkar kan iada iala ki nongshongshnong bad ban pynthikna ba ka ain ka ieng rasong.
“Ym don mano manor uh ba lah ban shim ia ka ain ha ki kti jong ki. Ai ba ka Ain kan ieng rasong. La ka dei ka HNLC ne mano mano ruh kiba pynmih ia kum kine ki jingbyrngem, ka Sorkar ka don hangne ban iada ia ki” ula ong haba bynrap ba ki bor Sorkar kila shimkhia ia kum kine ki jingbyrngem.
, ong u Symbud Myntri Rangbah Bah Prestone Tynsong.){kind=link}