Shillong, K’lyngkot 12 : U President ka Congress Bah Vincent H Pala ha ka sngi Saitjain ula ong ba ka Party kan pdiang ha kano kano ka por ia u Nongialam barim bad President ba mynta ka AITCC Bah Charles Pyngrope ba un wanphai biang sha ka party.
“U (Bah Charles) dei u Nongialam. U dei uba don bad ka Congress. U dei u briew ba kongsan bad kumjuh ruh ki nongkyrshan ki long kiba kongsan. Lada phi ioh ia ki nongkyrshan, lada ngi buh kyrtong iano iano ruh, ngi don beit ka jingkyrmen. Ha kaba sdang, ki nongkyrshan kila wan pyniasoh sha nga bad mynta ngin sa pdiang sa ia u ban wan iasoh lang noh” ong u Bah Pala.
“Bad lada um wan pyniasoh bad ngi ruh, ki nongkyrshan jong u kin ioh ia kajuh ka burom kumba ai ia u Bah Charles lane kham bha ban ia u bah Charles” ula ong haba bynrap “Kumta, nga sngew skhem ba ha Nongthymmai ruh, u Bah Charles ha kawei ka sngi un sa pyniasoh ne em ia kata ngam lah ban ong namar kane ka dei ka rai jong u hynrei ngan sngewtynnad eh ba un wan namar kum ki congress, ngi pdiang beit iano iano ruh”.
