Shillong Nailar 01: Ha ka shnong kaba don sha kyndong bha ka jylla Meghalaya, ha kaba ki riat ki ram ki pyniaid iaka rukom im bad ka jingim ki briew, hynrei ka jingjia kaba phylla kala jia ha kane ka Shnong kaba pyni ia ka jingiatylli bad ka jingkut jingmut jong ki Nongshongshnong ban iarap para briew.
Ka Village Health Council (VHC) jong ka shnong Mynriah kaba don ha Mawkynrew, East Khasi Hills District, ka jaka bym poi kali bad kaba shitom ban poi, kila ieng tylli kawei ban ai jingiada ia ka jingim jong iwei i longkmie iba la tymmen kaba don ia ka jingpang Hypertension.
Ine i tymmen iba la don 86 snem ka rta, ila don hapdeng ka jingpang kaba jur namar ka jingpang Hypertension, kaba donkam ia ka jingsumar ba kyrkieh. Ka shnong Mynriah ka dei kaba jngai ar kynta ban iaid kjat na Mawkynrew bad ka bym pat poi surok haduh mynta.
Hapdeng kitei ki jingeh, ki dkhot ka VHC jong ka Mynriah da ka jingsngewrit bad ka jingkitkhlieh, kila ïatreilang bad ka Primary Health Centre (PHC) ha Mawkynrew ban pynbeit ïa ka leit ka wan bad ban ai jingsumar ia ine I tynmen
Da kaba pynbiang da ka jingthiah kaba lah ban rah ne Stretcher, ba la pynbiang da ka National Health Mission (NHM), ki nongshong shnong kila mih ban iaid iaka lynti lyngba ki khlaw kiba rben bad ki lhuh, kila rah ia ine i tymmen iba don jingpang. Ka thong jong ki ka long kaba shai, ban pynthikna ba ine I tynmen in ioh ia ka jingsumar ba kyrkieh khlem da buh hakhmat ia ka jingjngai ne ka jingeh ba kin iakynduh.
Mar ia poi ha Mawkynrew PHC, ia ine i tymmen iba la noh ka rta, la buh baroh shimiet ban peitngor bad hadien kane la phah ia i sha ka jaka ba donkam kyrkieh ia ka jingkhmih bniah ha ka liang ka koit ka khiah kaba iadei bad ki kynthei bad kaba iadei bad ka jingpang ha ka bor pyrkhat pyrdain. Hadien bun kynta jong ka jingsumar kaba aiti lut, la pynkit noh ia ine i tynmen sha Ganesh Das Hospital ba in ioh iaka jingsumar kaba donkam.
U Dr. Lamshuwa Mawlong jongka Mawkynrew PHC ula ai ka jingïaroh ïa ki nongshong shnong halor ka jingtrei shitom kaba phylla ka jongki. “Kaei kaba ngi la sakhi mynta ka sngi, ka long ka nuksa kaba khlain bha ia kaei kaba lah ban pynurlong, haba ka shong ka thaw ka iawan lang na ka bynta kawei ka thong. Ka jingkut jingmut bad jingieid kaba la pynpaw da ki paidbah ka Mynriah ka long shisha kaba ai mynsiem,” ula ong.
Kane ka jingjia kam pynpaw tang ia ki jingeh kiba ki shnong kiba jngai ki iakynduh ha kaban ioh ia ka jingsumar hynrei ka pynpaw ruh ia ka jingdonkam ia ki sienjam ban shim da ki paidbah. Ka VHC Mynriah kala buh ia ka nongrim na ka bynta kiwei pat ki shnong ki thaw, kaba pyni ba ym don kano kano ka jingeh kaba ym lah ban weng haba ki paidbah ki iatylli da ka jingthmu kaba ki donlang.
Village Health Councils
Ki nongkitkam jongka Village Health Councils (VHC) kidei kiba la jied da ki nongshong shnong ia kaba la kyntiew pat da ka sorkar Meghalaya ha u Rymphang 2022 kum ka jaka treikam ba kongsan kaban pynlong ïa ki kam ha kaba ïadei bad ka koit ka khiah bad ka jingbam ia ki jingbam kiba tei bad ban shakri kum ka jingïadei kaba kongsan hapdeng ki tnad ka koit ka khiah jong ka jylla bad ki dkhot ha ka imlang sahlang.
Ki kynthup ia baroh ki shynrang bad kynthei kiba dei ki khlieh jong ki longiing ha ka shnong. U Nongsynshar shnong udei u Chairman bad u VO President (SHG Federation ha ka shnong) kum u C–chair bad la synshar da ka komiti treikam ba la jied, kaba kynthup ia uwei u nongmihkhmat na man la ki 10 tylli ki longïing, 50% na ki seat jong ka Executive Committee la buh kyrpang na ka bynta ki kynthei. Ki Accredited Social Health Activist (ASHA) bad Anganwadi worker (AWW) kidei ki dkhot ba pura jong ka VHC. Ki nonghikai na ki skul ha shnong, ki Community Gender and Health Activist (CGHA) bad Auxiliary Nurse Midwives (ANM) kidei shi bynta jong ka VHC.
Ka jingthmu jong ki VHC ka long ban pynmih ia ka jingdawa ban ai iaka jingshakri ha ka koit ka khiah hapoh ki shnong ki thaw. Katkum ka jingpynpaw jongka tnad ka koit ka khiah, “Ka jingthmu ka long ban wanrah ïa ka jingsngew trai hapdeng ki paidbah ban pynbeit ïa ki jingeh kiba bunsien la shu ieh kumto khlem da shimkhia ne pynb
