Itanagar, Lber 24: Ki shipai ryngkew ryngkat ki shipai suin (Army-IAF) dang shen ki la pynlong ryngkat lang ia ka jingkilan met ban pynkloi ha kaba iadei bad ka jingpynkhreh ia ki bor shipai hapoh Arunachal Pradesh.
Kane ka jingkilan met ka thmu ban khmih halor ka jinglong ba la pynkhreh na ka bynta ka thma bad halor ki kam iakhun pyrshah ha ka thain mihngi, kata hapdeng ka jingiakynad kaba dang iai bteng ha ki jaka khappud jong u Line of Actual Control (LAC) bad ka China.
Kine ka jingkilan met hapdeng ki shipai Army-IAF ka long ruh ban khmih halor ka jingiatreilang kaba na suin ba na ryngkat bad halor kumno ban pyniaid shakhmat ia ki kam iakhun pyrshah.
Watla kim shym la don satia kino kino ki dak ki shin jong ka jingiakynad lai snem hadien ka jingiakynad kaba la jia bad ka china ha ki bynta mihngi ka Ladakh, ha kaba baroh arliang ki dang iai bteng ban pynap ia kumba 50,000 ngut ki shipai ha ryngkat ki tiar iapom kiba khlainbor, hynrei ka jingiakynad ka la jia ruh ha lynter ki jaka khappud jong u LAC hapoh Sikkim bad Arunachal Pradesh naduh ba ki shipai ka China ki la poi sha ka jingialeh markylliang ha Yangtse ha ki bynta ba kongsan jong ka Tawang sector kaba la jia ha ka 9 tarik u Nohprah jong ka snem ba la dep.
“Kane ka jingkilan met kaba 96 kynta ka la lah ban wanrah ia ka jingiasngewthuh jingmut lang hapdeng ki tnat bapher bapher na ka bynta ban pynkloi ha kaba iadei bad ka jingpynkhreh ia ki bor shipai, ban pynpoi ia ki shipai bad ban phah ia ki bor shipai sha kito ki jaka kiba donkam,” ong u heh shipai.
Ia kane ka jingkilan met ba la khot ka “Vayu Prahar” ka kynthup ruh ha kaba iadei bad ka jingpynpoi ia ki kynhun rapid reaction force kaba kynthup ia ki bor shipai kiba kyrpang na ki jaka bapher bapher ban iashim bynta ha ki jingialeh kiba na suin bad na ryngkew kaba kynthup ha ki jaka riat bad ki jaka lum hajan ki bynta jong u LAC hapoh Arunachal Pradesh.
