Shillong, Kyllalyngkot 06: Ka jingdon jong ki Nongthep Vote ka Jylla Meghalaya kala kiew da 52,412 ngut kat kum ka final electoral roll u snem 2025, kaba pynkiew ia ka jingdon ki nongthep vote sha ka 2,269,512 ngut.
Na ki 2,269,512 ki nongthep vote ki kynthup ia 1,118,907 ngut ki shynrang bad 1,150,599 ki kynthei bad 6 ngut ki Third Gender.
U Chief Electoral Officer (CEO) Dr BDR Tiwari ula pynbna ba la pyndep ia ka Special Summary Revision ha ka 1 tarik u Kyllalyngkot 2025 bad la pyndep ia kane ka kam da kaba iaid bin pa bin ban pynthikna ia ka jingpynbeit ryntih bad ka jingkynthup ia baroh ha ka electoral roll.
Ha kane ka electoral roll ki don 72,941 ngut ki nongthep vote kiba dei ki khynnah ha ka rta kaba 18-19 snem, ryngkat bad 10,398 ki nongthep vote kiba la noh ka rta bad 11,960 ki briew kiba don ki jingduna ha ki dkhot met.
U Dr. Tiwari ula batai shaphang ka jingiaid ha ki ar rukom ia ka jingpynthymmai ia ka thup kyrteng jong ki nongthep vote ha ka jylla. Ha kaba ia ka pre-revision phase la sdang naduh ka 20 tarik u Nailar haduh ka 18 tarik u Risaw da kaba leit pynthikna na man la ki iing, ki jaka thep vote bad ban pynbeit ia kino kino ki jingbakla ne jingduna.
Ka Revision Phase kala sdang da ka jingpynmih ia ka Draft Electoral Roll ha ka 29 tarik u Risaw 2024, ha kaba la ailad ia ki nongshong shnong ban kam ne pyrshah ‘claims and objections’ haduh ka 28 tarik u Naiwieng bad la pynlong ruh ia ka Special campaign ban pynshlur ia ka jingashimbynta bad ia baroh ki jingkam la pynbeit hapoh ka 24 tarik u Nohprah.
Ban pynbiang iaka jingpynrung ia ki nongthep vote kiba thymmai, kumta la kyntiew noh ia ka jingdon jong ki jaka thep vote na ka 3511 sha ka 3512 bad ka jylla kala lah ruh ban pynurlong 100% ia ka jingai ia ki EPIC kaba pyni ia ka jingskhem jingmut ha ka rukom treikam.
U Dr Tiwari ula iaroh ia ka jingshimkhia jong baroh ki seng sain pyrthei bad ki nongshong shnong ha kaban pynthikna iaka jingiaid beit ha ka jingpynrung kyrteng ia ki nongthep vote. Ula banjur ia ka jingkongsan ban bteng ia kane ka rukom iatreilang bad ula pynpaw ia ka jingling kongsan ruh jong ki rynsan kum ka ECI Portal bad Voter Helpline Mobile App kiban kyntiew ia ka jingioh jingtip jong ki nongthep vote.
