Shillong, Kyllalyngkot 07: Ka Hynñiewtrep Border Disputed Redressal Forum (HBDRF) hynne ka sngi Ba-ar, ka la kyntu ia u Myntri Rangbah ka Jylla Conrad K Sangma ban shim khia ha ka ban iakren bad ka Sorkar Assam na ka bynta ban pynduna ia ka khajna na u synsar ha Block-I bad Block-II.
Ha ka shithi sha u Conrad ka forum ka la ong, “Na ka liang jong baroh ki paid Khasi Pnar ka Block -I & II, (ngi) kyrpad ia phi ba phin shimkhia ban iakren bad u Myntri Rangbah ka Assam na ka bynta ban pynduna ia ka khajna na u synsar”.
Ka forum kala ong ba ka Sorkar Assam kam pat ithuh ia u synsar kum u mar rep hynrei la khein ba u dei u mar khlaw.
“Kane ka plie ka lad ia ka tnad khlaw jong ka Assam bad ka tnad khlaw jong ka Karbi Anglong Autonomous Council ban shim khajna na u synsar bad kumba long mynta la shim khajna T.12,000/- haduh T.15,000/- na ka bynta kawei ka Mahindra Bolero Pick-up Truck” la ong ka shithi.
“Namar ka jingsniew jong ka surok ka Pickup truck ka lah ban kit tang 1.2 metric ton lane 1200 kg katba ka khajna ka poi sha ka 10-12 tyngka shi kg kumta ki paid Khasi Pnar jong ka Block -I & II ki hap ban mad ia ka jingduhnong kaba khraw ” la bynrap ka shithi.
“Kumta, ngi kyrpad ba phin tuklar mardor shwa ka por ban die ia une u mar, mynta u bnai Kyllalyngkot 2025, khnang ba ki nongrep jong ngi kiba sah ha ki jaka ba don ka jingiakynad kin ioh ia ka dor kaba biang kumba ki dei hok ban ioh” la ong ka forum.
