Shillong, Jylliew 14 : Ka “50 days Aadhar Saturation Programme” jong ka Tnad Social Welfare ka Jylla kala seisoh bha ha kaba tang hapoh shibnai, ka jingpynrung kyrteng Aadhar kala kiew na ka 13% shuwa ban sdang ka Campaign sha ka 78.21 % kat haduh ka 14 tarik Jylliew, 2023.
Kane ka jingpynrung kyrteng Aadhar kala kiew sted ha Jylla hadien ba ka Sorkar Jylla kala pynbna ba ka Sorkar Pdeng kala rai ban pynduh noh ia ki skhim bapher bapher kynthup ia ka jingsam marbam, Supplementary Nutrition Programme bala mang sha ki Longkmie ba dang ai buin khun bad ki Khynnah ba hapoh ka 6 snem.
Ka Tnad Social Welfare kala pyntreikam ia ka Aadhar Saturation Campaign ban pynrung kyrteng ia baroh ki nongshongshnong bad pyniasoh ia ki kyrteng jong ki sha ki lad jingmyntoi baroh, ia ki ban sa paw ha ka POSHAN Tracker bad kin sa ioh ia ki Supplementary Nutrition na ki Anganwadi Centre.
Ia kane ka Campaign la pyntreikam hadien ba ka Ministry of Women and Child Development kala pynbna ban pynduh noh ia ka Supplementary Nutrition Programme bala ai sha ki 10% namar ka jingduna palat kiba don kyrteng Aadhar napdeng ki Longkmie ba armet, kiba ai buin khun bad ki Khynnah kiba hapdeng 0-6 snem ka rta ha Jylla.
Ka Ri-Lum Garo kala kiew bha ha ka jingpynrung kyrteng watla ki paidbah kila mad ia shibun ki jingeh ban leit ieng lain namar ka jingshit kyrang ka bneng bad ka jingpynlip bording.
Lai tylli ki District ka Ri-lum Garo ki la kynjoh ia ka 95% ha ka jingpynrung kyrteng Aadhar bad artylli kila kot ia ka 90%. Ka Ri-lum Jaintia bad ka Ri-Bhoi ruh kila kiew bha ha ka jingpynrung kyrteng.
Ka Ri-lum Khasi ruh kala sdang kiew hynrei kam pat kot satia kumba long kiwei khamtam lei ka South West Khasi Hills bad ka West Khasi Hills. Ka jingpynrung kyrteng Aadhar ia kiba ioh skhim ICDS kala kot sha ka 78.21% napdeng ki 4.45 lak ngut ki nongioh jingmyntoi.
Ki Deputy Commissioner jong baroh ki District kila pyntreikam ia ki buit treikam bapher bapher ban pynshlur ia ki paidbah ba kin pynrung kyrteng Aadhar noh nalor ban ai mynsiem ruh ia ki Nongtrei ba kin trei shitrhem.
Haba ithuh ia kane ka jingtrei shitom, ka Tnad Social Welfare kala ai ka jingkhublei sha baroh ki Deputy Commissioner bad ki Ophisar ka Tnad, ki DOP ka ICDS, CDPO, ki Anganwadi Workers bad ki Nongialam kiba la trei borbah ha kane ka campaign.
