Ka jingai snam ka pynioh ia ka met ba koit ba khiah bad kaba ai jingim ia kiwei : Rayonald

Nongpoh, Jylliew 14: U President ka Ri-Bhoi District Cricket Association (RBDCA) Bah Rayonald Kharkamni, ula ong ba ka jingaisnam ka dei kaba iarap ia u/ka briew ban ioh ia ka met kaba koit ba khiah bad ka dei ruh ka ai jingim bad iada ia ka jingim jong kiba pang ba shitom.

U Bah Rayonald ula kren ia kane ha ka jingrakhe ia ka “World Donors Day” bala pynlong da ka RBDCA hynne ka sngi ha Nongpoh. Ka RBDCA kala pynlong ruh ia ka jingleit synniang snam ei sha ka Blood Centre ka Civil Hospital, Nongpoh ba kan pyndonkam ha kaban sumar ia kiba pang ba shitom bad ban iada ia ki mynsiem briew.

Ia kane ka jingleit synniang snam la ialam hi da u Bah Rayonald kum u President bad u Bah Micheal Kharhunai, Secretary kiba la lamkhmat nyngkong eh ban synniang ei ia ka snam ha ryngkat ki nongkitkam bad ki rang ialehkai cricket jong ka Association.

Haba kren ha ka jingialang ba lyngkot, u Bah Rayonald ula ban jur ba ka jingaisngewbha ia ka snam ka long kaba donkam bha bad kadei kawei na ki bynta ban ioh ia ka met kaba koit ba khiah.

Kum uwei na ki nongaisnem, ula pynthikna ruh ba ka jingaisnam kam don jingktah eiei ia ka met ne buh ia kano kano ka jingma.

Ula kyntu ruh ia ki paidbah ba kin mih shakhmat ha kaban ai sngewbha ia ka snam khlem kano kano ka jingartatien. “Lada ngi long shlur ban wan ai sngewbha ia ka snam, kan long ruh ka jingpynim ia kiwei pat kiba don hapdeng ka jingshitom bad jingduh jingkyrmen” ula bynrap.

Pule lang ia kane: Kam u Myntri ka Assam : Dei ki runar kiba pynthut ia ki paidbah ha Khappud, kim dei satia na Assam