Shillong, Risaw 07: Ka Meghalaya kala sakhi ia ka jingkiew ba palat 9 lak ha ka jingdon ki nongthep vote ha kine ki 20 snem bala leit noh, kaba pynkot mynta ia ka jingdon ki nongthep vote baroh lang sha ka 23 lak.
Ia kane la pyntop da u Chief Electoral Officer (CEO) Dr BDR Tiwari haba iakren bad ki lad pathai khubor halor ka jingpyn khreh ia ki kam ki jam na ka bynta ka Special Intensive Revision (SIR), kaba la leh dang shen da ka Jylla Bihar, ia kaba ka Election Commission of India ka dang pynkhreh ban pynbna ban leh ha baroh kawei ka Ri.
Kat kum ka jingong jong u, “Ka jingdon ki nongthep vote ha Meghalaya kat haduh u bnai Nailur 2025 ka kot haduh 23,06,384 ngut haba ianujor bad u snem 2005 kaba kot 13,35,816 ngut (kaba pyni ia ka jingkiew da 9 lak).
U iathuh ba ka jingkhein jong u Nailur 2025 ka pyni haduh 11,37,316 ngut ki nongthep vote shynrang bad 11,69,062 ki kynthei. Haba nujor, ka jingdon ki nongthep vote ha u 2005 ka long 6,64,306 ki shynrang bad 6,71,510 ki kynthei. Nalor kane, ki don hynriew ngut ki nongthep vote bahkong (third gender) kat haduh u bnai Nailur 2025, ia kaba kim don satia ha u 2005.
U iathuh ba ki don haduh 4 jait ki nongthep vote bala buh kat kum ka SIR. Kine ki kynthup ia ka thup A-ki nongthep vote kiba ki kyrteng la register ha u snem 2005 kin hap ban upload/aiti ia ki kopi jong ka thup nongthep vote u snem 2005 lem bad ki form pynrung kyrteng, ka thup B-ki nongthep vite kiba ki kyrteng ym shym la lap ha ka thup 2005 bad kiba la khia ha India hashuwa ka 1 tarik Naitung 1987, kin hap upload/aiti ia ki kot ki sla ba batai shaphang jong ki lem bad ka form thep kyrteng, thup C-ki nongthep vote kiba kha hapdeng ka 1 tarik Naitung 1987 bad 2 tarik Nohprah 2004 kiba ki kmie ki kpa kim shym la pynrung kyrteng ha ka thup nongthep vote u snem 2005 kin hap ban upload/aiti ia artylli ki kot-kikot ki sla ba batai shaphang jong ki bad ki kot ki sla la ka dei jong ka Kmie ne u Kpa bad ka thup D-ki nongthep vite kiba la kha hadien ka 2 tarik Nohprah 2004 kiba ki Kmie ki Kpa kim pat pynrung kyrteng ha ka thup nongthep vote u snem 2005, kin hap ban aiti/upload ia lai tylli ki kot ba donkam-ki kot ki sla ba batai shaphang jong ki, ki kot ki la jong ka Kmie bad jong u Kpa.
U Dr Tiwari ula pyntip ba ka ECI kala pynbna ba kan pdiang noh ia ka Aadhaar Card kum ka jingpynithuh haba pynrung kyrteng kum ki nongthep vote nalor ki 11 tylli ki kot ki sla bala buh lypa. Kane ka rai kala mih hadie ba ka Iingkashari Supreme Court kala bthah ban kynthup ia ka Aadhaar kum ka kot pynithuh ba donkam.
Nalor kane, u CEO ula pyntip ba ka jingdon jong ki Polling Station hadien bala pynbeit ryntih ka long 3615, kaba kiew haduh 64 tylli ki polling station.
