Shillong, Rymphang 07 : Ka jingiap jong ki nongbylla tih dewiong ha ka jingbthei ka par tih dewiong beain ha Mynsngat, kaba don ha ka thain Thangsko, East Jaintia Hills, kala kiew sha ka 27 ngut bad kiba mynsaw kila poi sha ka 9 ngut.
Ia kane la pyntip da ka State Disaster Management Authority (SDMA) kaba pyntip ba ki kynhun ai jingiarap ba kynthup ia ka NDRF, SDRF bad SRT, ki dang iai bteng ban wad ia ki briew kiba jah ha kane ka par.
Ka dei ha ka step 5 tarik Rymphang, ka jingbthei dynamite kaba jam kala jia ha kane ka par tih dewiong beain. Ki Pulit kila register da ka ejahar suo motu ia kane ka jingjia bad kila kem ruh ia arngut ki trai jong kine ki par.
Kine ki trai par ki kyrteng u Forme Chyrmang ba 36 snem, ba na Jalaphet Pordung, East Jaintia Hills bad uwei pat u Shamehi War ba 42 snem ba na Sutnga Pohwailong, East Jaintia Hills.
Ia kine ki arngut la ialam tian bishar hakhmat ka Iingkashari kaba la ai bor ia ki Pulit ban set 3 sngi hapoh kaPolice custody na ka bynta ban pynlong ia ka jingtohkit kaba bniah.
U Myntri Rangbah ka Jylla Conrad K Sangma ula bthah ban pynlong ia ka jingtohkit kaba bniah bad ban leh da kaba tyngeh ia ki trai par, ki nongpyntrei ia kane ka par.
Ula pynbna ruh ia ka song jingiarap ba T.3 lak sha ki longiing jong ki nongbylla ba khlad.
