Shillong, Nailur 14 : U Myntri Rangbah ka Jylla Conrad K Sangma ula ong ba ki sngi ban shong ia ka Dorbar Synrai ka dei ka ba la rai da ka Business Advisory Committee (BAC) ba long dkhot ruh da ki MLA Liang Pyrshah bad ka jingbuh iaki sngi ka long kumba ju long ha ki snem bala leit noh.
U Myntri Rangbah ula kynthoh ia kane halor ka jingdawa jong ka Voice of the People’s Party (VPP) ban pynbun shuh shuh iaki sngi shong dorbar, kaba la rai ban pynlong tang 5 sngi naduh ka 15 tarik Nailur haduh 22 tarik Nailur.
U Myntri Rangbah ula pyntip ba ki don ki Bill kiban sa wanrah ha kane ka Dorbar Synrai bad kin don ruh ki Ordinance ki ba donkam ban pynlong ain.
Hynrei ka VPP kala pynpaw ia ka jingbym sngewhun ba lyngkot palat ki sngi shong dorbar haba kdew ba ki don bun ki ishu kiba ki MLA ki kwah ban rah iatai.
