Shillong, Jymmang : U MP ka Rajya Sabha Dr WR Kharlukhi ha ryngkat lem bad u nongai buit u Myntri Rangbah ka Jylla Bah Hamlet Dohling, kila pynhap pyrda noh ia ka jingrakhe dap 150 snem jong ka skul Umlyngka Presbyterian Lower Primary ha ka sngi Thohdieng.
Ia kane ka shlem ai jingnang jingstad la seng ha u snem 1875 bad ha kane ka sngi napdeng ki kongsan la ia don lang ruh ki Pastor, Tymmen Basan, ki nongialam Balang, ki Nongialam Shnong, ki nonghikai bad ki kmie ki kpa.
Haba kren ha kane ka sngi kum u Kongsan, u MP u la ong ba ka long ka kam kaba khraw haduh katta katta ba katei ka skul ka la lah ban kam ia u mawmer ba 150 snem ha ka pule puthi.
“Ban ong ba la 150 snem kane ka skul ka la shakri ka la dei ka kam kaba khraw bha,” la ong u MP.
Ha kajuh ka por u ong ruh ba ki mishoneri kiba wan ban seng skul 150 snem mynshwa ha kane la thain ki dei ki agent ba la phah da u Blei ban wanrah ia ka jingshai ia ka shnong ka thaw lyngba ka pule puthi.
Da kaba ai burom ia ki nonghikai ha kine ki 150 tylli ki snem, u Kongsan u la ong ruh ba wat ialade u kham sngewtynnad ban pynithuh kum u nonghikai ym kum u MP namar ka kam nonghikai.
Na ka liang u Bah Hamlet u la ong ba lada kren ia ka 150 snem, um lah atia khlem da phai sha ka mynnor, kumno ba ha ki 150 snem mynshwa ki mishoneri ki poi ban mutdur ban seng skul ha kine ki jaka.
“Dei ka jingialam lynti jong u Blei ba la lah ban seng ia kane ka skul ban pynroi ia ka jingnang jingstad ha kane ka thaiñ,” u la ong.
Da kaba pynpaw ia ka jingsngewnguh ia kane ka skul kaba la shakri ha kine ki 150 snem, u Bah Hamlet u la ong ruh ba ki skul Balang ki la ai ka jingshakri kaba bha tam na ka bynta ka pule puthi ha kane ka Jylla.
“Nga kyrmen ba ka jingiaid lynti jong kane ka skul kan nang janai bad na kane ka skul kin mih ki khlur kiban shakri ha ka imlang sahlang bad ha ka jaidbynriew.
