Nongstoiñ, K’lyngkot 18: U President ka Meghalaya Pradesh Congress Committee (MPCC) ma Vincent Pala, u la ong ba baroh ki party hapoh ka sorkar MDA ki long kum kito ki khla kiba bam doh hati.
Une u MP ka Lok Sabha na Shillong, ula kren ia kane ha ka jingialang paidbah jong ka Congress kaba long ha Nongstoin, haba kdew ia kaei kaba ka UDP, BJP, PDF bad kiwei kiwei kila sdang kynnoh bun jait ia ka NPP.
“Haba ka doh ka dang bun kim (party ba don ha ka MDA) don jingkhih hynrei hadien ba ka doh kam don shuh bad sah satang ki shyieng, ki sdang ban wad dong wad daw uwei ïa uwei pat” ong une u Nongialam ka Congress.
“Phi iohi naduh ba sdang ïa ka jingïatreilang hapdeng ka BJP, NPP, PDF, UDP, HSPDP. Katba dang ieh ha ka bor jong ka Congress, ka spah kaba bun, ka kam ka jam kaba bun, kine ki ïa ieit bha, ki da ïa snohkti, ki da leit ap leit lang shaduh Guwahati bad kim ju ïa kynnoh iwei ïa iwei. Hynrei, haba la lut ka spah, kine dang shen ki la sdang ïa kynad para ma ki ban ïaknieh ïa ka shyieng” ula bynrap.
U ma Vincent ula ong “Dei na kane ka daw, ka Congress ha kane ka wat ba mynta kan jop bad kan da jop kput ïa ka jingmutdur jong ngi. Balei..? ka daw ka dei namar ba ki paidbah ki la phai ba ki la ïohi ba kine kiba don ha ka sorkar mynta, kim don jingmut ei ei ruh ban trei na ka bynta ki paidbah. Hynrei, tang ban ïaknieh ïa ka doh ne ka shyieng para ma ki”.
Na ka liang u Ma Pala u la kyntu ia baroh ki dkhot bad nongkitkam jong ka party ba kin trei shitrhem khlem phai shane shatai hynrei ban buh beit hakhmat ba ka party kan jop ha man ki jaka bad ki Constituency ka District, khnang ban wanrah pat ïa ka jingsynshar kaba khuid, ka bym don jingleh shillïang ïano ïano ruh lada dei ïa kiba don ba em ne kiba duk ba shem jynjar.
