Nongpoh, Jylliew 10 : Kawei ka mynsiem briew ka jan duh ei tang na ka jingjai tuh jong ki Nos, ki bym salia ban ialehkai ia ka iap ka im jong kawei ka Nongpang, kaba ki bahaiing hasem kila leit aiti ha ka kti jong ki, da ka jingshaniah ban ioh ia ka jingkoit jingkhiah.
Kane ka jingjia kala jia ha ka step sngi u Blei ia kawei ka Nongpang, kaba leit thiah pang hapoh ka Civil Hospital Nongpoh, Ri-Bhoi District.
Ki bahaiing jong kane ka nongpang (bym kwah pynpaw kyrteng), kila iathuh ba hynne ka step kumba 3 duna eiei, katba kane ka nongpang ka dang iohthiah, u pipe drip ba pyndait ha kti jong ka, ula lait kynsan na ka kti bad ka snam kala phlei laki laka haduh ba kala lynkien ha jingthiah bad kumjuh ruh sha madan.
Ki iathuh ba ka Nongap haba iohi ia kane, kala leit ban pyntip bad pan jingiarap mar mar na ki Nos kiba don ha ka kam hynrei la kynnoh ba kine ki nos kila leh bym patiaw wat hadien ka jingleit khot ba bunsien haduh ba ka snam kala theh sha madan bad ha jingthiah.
Ki iathuh ba dei da ka jingleit tyntuh shi tynruh, ki nos kila kynhied ruh ia ka nongleit khot tad haduh da ka jingbym banse kila leit ban jngoh bad pyndait biang ia u pile drip.
Ia kane ka jinglyngkien ka snam ha jingthiah bad sha madan la sakhi na ki video bala ring bad la lap ruh ia ka da ki Nong ialam ka seng Ri-Bhoi Youth Federation (RBYF)-Nongpoh Circle, kiba la leit jngoh ia kane ka nongpang halor ka jingioh jingtip ia kaei kaba la jia na ki bahaiing hasem.
Ka seng RBYF hapoh ka jingialam u President samla Alberto Nongsiej, kala leit ban buh ia ka jingujor hakhmat ka Medical Superintendent ka Cicil Hospital bad dawa ruh ba dei ban leh da kaba tyngeh ia ki nos kiba don ha ka kam ha katei ka por ba jia kane ka jingjia.
