Shillong, Jylliew 10 : U MP ba dang shu jop jong ka Congress na Tura Saleng A Sangma, ula kynnoh ba u Myntri Rangbah ka Assam Himanta Biswa Sarma u dei uba don jingpang ‘jingbym biang ka khlieh’ namar ka jingkynnoh ia kawei ka niam ha Meghalaya halor ka jingshah rem ka NDA ba ialam ka BJP ha ka elekshon Lok Sabha ba dang shu dep.
Haba iakren bad ki nongthoh khubor hynne ka sngi Nyngkong, u Saleng ula ong “U CM ka Assam dalade ula kren halor ka niam ha ka jingialap elekshon. Hato phi khlem iohi ia kato kawei kaba ki pyrshang ban pynduh jait? Phi iohi ba u CM ka Assam ula pynduh ia baroh kito kiba don jingiadei niam. Ma u hi uba kren bha halor ka niam bad ha ka por ialap eleshon bad shuwa kane ruh ula ialeh ban pynduh jait ia ki paid Muslim”.
Haba kylli, u MP ka Tura ula ong “Phi la iohi hi, kumta balei ba u (Himanta) kynnoh ia ka niam mynta. Ha ka jingshisha um dei satia ban kynnoh ia ka niam. Ta ka daw nga ong ha phi ba u lah ban don jingpang ha ka khlieh halor kane ka bynta”.
