Shillong, Jymmang 03 : U Myntri ka Tnad jngohkai Bah Paul Lyngdoh hynne ka sngi Thohdieng ula pynpaw ia ka jingsngewkhia halor ka jingpyrshang ban pynthut ia ka shongsuk shongsain hapoh ka Jylla Meghalaya bad ong ba ki briew kiba donkti ha ki jingkawang petrol bomb, ki dei ki briew ki bym pyrkhat ia ki jingmyntoi ka Jylla Meghalaya.
“Nga lah dep pynpaw ia ka jingsngew jong nga sha u Myntri kam Pohiing bad ngi sngewkhem ba dei ban pynkut noh ia kane bad kane kan sa urlong” ong u Bah Paul haba iakren bad ki lad pathai khubor haba jubab ia ka jingkylli halor ka jinglong jingman ka suk ka sain namar ka jingiai jia ki kam kawang petrol bomb hapoh Nongbah bad kiwei ki jaka.
“Kino kino kiba leh bad kino kino kiba donkti ha ka jingthombor khlem pep ki dei ki bym pyrkhat ia ka jingmyntoi jong ka Jylla Meghalaya” ula ong.
Haba pyntip ba baroh kawei ka pyrthei ka phaikhmat sha Meghalaya kum kawei pat ka jaka wan shangkai namar kiba bun ki daw kynthup ka jinglong ka mariang hangne bad ka Environmental Quality Index (EQI), u Bah Paul ula ong “ Kum kawei na ki Hill station ba don ia ka EQI level ba 60 ne duna bad hapdeng kane ka jingbeh leh khluid hapoh ka thain, ngi dei kawei na ki jaka kiba lait na baroh kine ki jingktah ka mariang”.
La kine ki jingjia kin ktah ia ka jingwan ki nongshangkai pyrthei sha Jylla, u Myntri ula ong “Nga sngew ba ka dang kloi palat ban shu rai kut. Ha ka jingshisha ka samoi jngohkai hangne ka sdang kiew naduh u bnai Jylliew bad da ki sienjam bala shim da ka Sorkar Jylla bad da ka jingkyrpad ia baroh kiba don bynta bad ruh ka jingshimkhia jong ki Pulit, ngi sngew skhem ba kane ka jinglong jingman kan sa kut noh”.
