Shillong, Nailur 13: Ha ka jingpyllait paidbah iaka Ayushman Bhava Campaign ha ka ri baroh kawei da ka President ka ri India ka Draupadi Murmu lyngba ka Video Conferencing, hynne ka sngi u Myntri Rangbah ka jylla Conrad K Sangma ula leit ban iashimbynta ha katei ka jingpyllait paidbah ha ka jylla Meghalaya kaba la long ha State Convention Centre ha kaba la iadonlang ka Myntri ka koit ka khiah ka Kong Ampareen Lyngdoh bad ki heh ophisar ka jylla.
The success of every mission is made possible only through concerted efforts of all stakeholders, Certain with our strong network of health workers,Village Health Councils, ASHAs, women SHGs, village heads and together with the hardwork of our health machinery will result in the… pic.twitter.com/odBa0Rkfl8
— Conrad K Sangma (@SangmaConrad) September 13, 2023
Haba kren ha ka jingialang u Conrad Sangma ula ong ba ka roi ka par kan long ka bym don jingmut lada ka sorkar kam lah ban pynbiang ia ki jaka sumar kiba biang ha kylleng ki shnong ki thaw.
“Ki tnad sorkar bapher ki don ia ki prokram kiba long thik tang ha kaba iadei bad ka imlang sahlang , ki kyrdan bad ka thaiñ bad buh ia ka thong ha kaba iadei bad ka mat jong ka koit ka khiah, ka pule puthi bad ka rep ka riang khnang ba yn lah ban pynurlong ha kaban ai iaka roi ka par kaba bha tam” ong u Conrad.
U Myntri Rangbah ula ong ruh ba ka koit ka khiah kam dei tang ka kamram jongka sorkar hynrei ka sdang ruh na ki rympei ïing jong ki riewshimet.
“Ka koit ka khiah ka sdang na ka rukom lehkhuid hapoh ïing, shnong bad ha ka thaiñ bad kumta ha ki kyrdan ki bapher ha ka imlang sahlang ki don ia ka bynta bad ia ka jingkitkhlieh ban pynthikna ba man la ki nongshong shnong ha ka jylla kin long kiba koit ba khiah kumta ka jingpyndonbynta lang ia baroh kiba don bynta ka long kaba kongsan bha” ula ong.
Ula iathuh ba khlem ka jingiashimbynta jong ka imlang sahlang kano kano ka prokram kan ym long kaba seisoh.
U Myntri Rangbah ula pynbna ba ban ai T.20,000 ia man la ki VHC kiba trei thikna ha kaban ai jingkyrshan ia ki kam jong ki VHC.
“Ngi dang ap khmih lynti ban iohi ba kumno ki VHC kin wanrah iaka jingkylla jong ka koit ka khiah ha ki shnong ki thaw” ula ong.
Ula pyntip ruh ba ka jingbhah tyngka ha ka koit ka khiah ka long kaba heh bha bad ka sorkar kala buddien ia ka koit ka khiah da kaba trei ia ki kam bad kyrshan da ka pisa bad watla kila don ki jingeh ha ka koit ka khiah, ka sorkar kala shimkhia ban ialeh ban weng ia kitei ki jingeh.
“Ka jingkyntiew iaka Sub Centre, CHC, PHC bad ki mat jong ki District Hospital kum ka jingduna ia ki jingdonkam kum ka um, bording, ka jingpynbiang ia ki dawai, ban ai jinghikai ia ki nongtrei, ban pyndonkam bad pynbiang ia ki tiar donkam kidei ki mat kiba la shimkhia khnang ba yn lah ban pynbha iaka rukom treikam jong ki jaka ai jingsumar” ong u Conrad.
U Myntri Rangbah ula pyllait iaka Village Health Council-IEC Book, Register bad pyllait ruh ia ka VHC App bad sam ia ki khusnam sha ki ‘Best Performers and Achievers’ ha ka VHC/TB/MHIS program.
Ka Ayushman Bhava campaign kaba la pyllait hynne ka sngi Balang kadei kaba la wanrah ha ka Seva Pakhwada naduh ka 17 tarik u Nailur bad kan kut ha ka 2 tarik u Risaw ha kaba yn pynlong ia ki prokram bapher ban kyntiew iaka rukom ioh jingsumar bad ban ai iaki jingpynsngewthuh paidbah.
Ka Ayushman Bhava kadei ka campaign kaba kynthup ia ka Ayushman Apke Dwar 3.0 kaba thmu ban thaw bad sam ia ki Ayushman Card sha baroh kito kiba ioh jingmyntoi kiba dang sah. Ka Ayushman Mela kadei shi bynta ban pynlong ia ki Health Mela man la ka taiew ha ki kyrdan jongka AB-HWCs bad Community Health Centres (CHC) bad ka Ayushman Sabha, ka village/ward level sabha ban pynlong ia ki prokram pynsngewthuh paidbah shaphang ki skhim kiba iadei bad ka koit ka khiah bad ki jingai jingshakri bad kumba 60,000 ngut ki briew kin ioh iaka Ayushman Bharat Card.
