SHILLONG, DEC 4: U Myntri Rangbah ka Jylla u Conrad K Sangma hynne ka sngi Palei ula pynpaw ba ka jylla kala mad ia ki jingtynjuh bad ia kiba bun ki kabu bad ong, ba shiteng na ka 38 lak ngut ki nongshong shnong hapoh ka jylla kidei kiba don hapoh 20 snem ka rta.
“Kane ka jingdon ki nongshong shnong kiba dang samla kadei ruh ka kabu kaba khraw bad ka jingtynjuh. Ki lah ban wanrah ia ka jingkylla ha ka jylla hynrei lada kyntait pat ia ki, ki lah ban long ka bor ban pynjot” ong u Sangma ha ka jingialang pyllait paitbah ia ka Platinum Jubilee Souvenir jongka St. Xavier’s Higher Secondary School, Tura, West Garo Hills district.
Ula batai ba ka sorkar kala pynleit jingmut ha kaban saindur ia ki samla lyngba ka jingbtin lynti, jingai ia ki kabu bad ka pule puthi kaba kordor.
Ha kaba iadei bad ka pule puthi, ula kubur ia ki jingtynjuh bad pynpaw ruh ia ki jingthmu bad sienjam ban wanrah ia ki jingkylla.
“Ngi pynlut palat T.3,500 Klur man la ka snem ha ka pule puthi, hynrei kaba sngewkhia kadei ka jingneh kumjuh jongka jinglong jingman ka kyrdan.Ka Meghalaya ka don kumba 55,000 ngut ki nonghikai bad 15,000 tylli ki skul. Kiba bun ki shnong ki don bun phew tylli ki skul hynrei tang khyndiat ngut eh ki khynnah skul. Ban pynkylla ia kane ka jinglong jingman ka long kaba iar bad kan donkam ban iaid da ki wat ha kine ki 15–20 snem, hynrei ka long kaba donkam ban wanrah ia ka jingpynbha kaba don jingmut pat”.
Ula banjur ruh ia ka jingkongsan ban pynneh pynsah ia ka kolshor, “Baroh ki khynnah pule, naduh kiba pule ha ka klas IV ne V kidei ban pule lang ia ka Khasi bad Garo. Kane ka long kaba kongsan bha ban pynneh ia ka jingriewspah ka kolshor barim bajah haba ai ia ka pule puthi kaba paka”.
U Myntri Rangbah ula iaroh ia ka Platinum Jubilee Souvenir Committee kaba la trei shitom ha kaban pynwnadur ia kane ka kot sah kynmaw bad ula iaroh ia ka rukom pynwandur thik pa thik ia ki jingthoh bad ki dur ki dar bad ula iaroh ruh ia ki khynnah pule ia ka jingpyni kaba itynnad ha kaba iadei bad ka kolshor.
“Haba ngi peit ia ka jingdap 75 snem jongka St. Xavier’s Higher Secondary School, Tura, ka jingim jong ka Sister Camino bad ka jingtrei met bad mynsiem jong ki sister bad ki nonghikai kiba la shakri hangne, ka ai mynsiem ia ngi ban ithuh ia ka jingthmu ha ka jingim ka jong ngi, ban long kiba iai shah ia ki jingeh bad ban shakri ia ki para briew. Ka jingsngewhun kaba shisha ka wan ym tang na kaba pynleit jingmut thik tang ialade, hynrei ban don ia ka jingsngewkhia na ka bynta kito kiba don ryngkat lang bad ngi”.
U Myntri Rangbah ula iaroh ia ka skul kaba la saindur ia ki katto katne ki khynnah pule kiba la paw ka jingtbit ka jongki hapoh ka jylla bad ula pynbna ia ki artylli ki jingnoh synniang kiba kyrpang, kaba kynthup ia ka jingai ia ka bos skul bathymmai na ka Chief Minister’s Special Development Fund bad ki tiar tem tiar put na ka bynta ka kynhun tem jong ka skul.
U Bishop Andrew R. Marak jongka Tura Diocese ula pynpaw ka jingsngewnguh ia ki Sister jongka Missionaries of Christ Jesus halor ka jingtrei met bad mynsiem mynta la 75 snem ha kaban ai ka jingshakri bad pynshlur ia ki khynnah pule bad ia kito kiba la pyndep ia ka jingpule na kane ka skul, ba kidei ban ieng bad batskhem ia ka nongrim kaba kila ioh jinghikai na ka skul.
“Leh ia kaei kaba phi ioh jinghikai na ka skul bad iarap ia kiwei ruh, khnang ba ngin nang iai roi shuh shuh” ula ong.
Ka Sister Marline Pinto, MCJ, kala pynpaw ia ka histori jong ka skul bad pynpaw ia ka jingwan poi ki Missionaries of Christ Jesus ha Tura ha u snem 1948 bad ka jingsdang ia ka skul da ka jingsngewrit ha kawei ka iingskum. Kala pynpaw ba kadei ka jingkiew shaphrang naduh ba la sdang ia ka English Medium ha u snem 1958 ia ka imlang sahlang bad ki sienjam ban ai ia ka jinghikai kaba kyrpang, ka jingsdang ia ka NIOS ban kyrshan ia kito kiba la iehnoh ia ka jingpule bad pynpaw ruh halor ki khynnah pule ki barim kiba la pawnam ha ka thain bad ha kylleng ki ri.
Ka B.R. Marak, Convener jongka Souvenir Committee, kala ong ba ka Platinum Jubilee Souvenir kadei kaba la pynwandur bha ban pyni ia ka jingiaid lynti ka skul da ka jingiatreilang, ban lum thup ia ki jingseisoh, jingtynjuh bad ki jingsah jingkynmaw kiban ai mynsiem ia ki pateng ban dang wan.
Hashwa kane, ka Sister Maria D’Silva, MCJ, Regional Directress, kala pynpaw ia ka jingdonnam ki Missionaries of Christ Jesus bad pynshlur ia baroh hapoh skul ban iaid shakhmat da ka jingkular kaba thymmai bad ka jingiatylli.
Ha kane ka prokram la pyni ruh ia ka kolshor kaba bun rukom, kynthup ia ka
Pirate Dance, Wangala Dance bad Ballet Dance kaba la iashimbynta da ki khynnah bad la pynkut ia kane ka jingialang da kaba ioh ia ka jingrwai jubili na ki khynnah skul.
