Agartala, Risaw 07 :Ki jaka khappud jong ki ri ba markhap ha lynter ka thain shatei lammihngi (Northeast) kila pynsuk shibun ha kaba iadei bad ki kam khaii ksiar beain.Ia kane la pynpaw da ka Directorate of Revenue Intelligence (DRI) hynnin ka sngi Palei.
Kine ki jaka khappud ba laitluid hapdeng ka India ka Myanmar bad ka Bangladesh hapoh Mizoram ki la shah pyndonkam bakla jur ha ki nongkhaii ksiar beain.
Na ka liang ka DRI kala ong ba ka jingioh kurup ksiar ba dang shen na ka thain Northeast ka pyni halor ka jingjur jong ki kam khaii beain lyngba ki jaka khappud bad ki ri ba marjan jong ka India, kata ka Bangladesh bad ka Myanmar.
“Watla ia kine ki jaka khappud kiba ioh ban rung ban mih laitluid la pyndonkam ha ki kam khaii beain naduh ki por kiba la leit, hynrei ka jingioh kurup ia haduh 11 synduk ka ksiar kaba don haduh 121 kilo tang ha une u bnai Nailur ba la dep ka pyni ba ka lynti iaid lyngba kane ka thain Northeast ka dang iai shah pyndokam bakla tyngeh ha ki nongkhaii beain,” ong ka DRI.
Dang shen ka DRI kala ioh ban kurup haduh 65.46 kilo ka ksiar kaba dei tynrai na shabar jong ka ri kaba la kot haduh kumbaT. 33.40 klur na Mumbai.
Ia kane ka ksiar bala thep ha ki pla bad pynbna ia ki kum ki jain ki nep la pynpoi lyngba napoh Aizawl sha Mumbai lyngba ka kali.
“Ka jingioh lum jingtip da ka tnat syntiat ka pyni ba kala don ka jingpyrshang na ka bynta ban khaii beain ia ka ksiar beain na Champhai-Aizawl, Mizoram sha Kolkata, West Bengal da kaba pynkit da ki kali.Kumta ban khanglad ia kane, na ka liang ka tnat kala shim ia ki sienjam ha ka 28 bad ka 29 tarik u bnai Nailur ba la dep.Na ka liang ki heh ka DRI kila pynlong ka jingpynap shrip ha ki surok highway kiba pyniasoh ia ka Siliguri bad ka nongbah Guwahati,” ong ka DRI.
