Guwahati, Naiwieng 02 : Haduh 128 ngut ki briew kila iap hynne ka step sngi Saitjain hadien ka jingkhynniuh u jumai ba 6.4 magnitude kaba la pynkhynniuh ia ka thain Sepngi jong ka Nepal hynnin ka miet.
Kat kum ka khubor, da ki phew ngut ki briew kila mynsaw bad ka jingleit ai jingiarap kala iaid shakhmat ha ki shnong kiba long lum.
Kat kum ka National Centre for Seismology (NCS), ka jingkhlain jong une u jumai kala kot haduh 6.4 magnitude bad ka thymmei jong u ka dei na Nepal ha ka jingjylliew ba 10Km.
Une u jumai uba ka thymmei ka dei ka Jajarkot, Nepal, ula khynniuh ha ka por 11:32 baje mynmiet, ong ka NCS. Ka Jajarkot ka dei kaba jngai kumba 250 mile shatei lam mihngi jong ka Nongbah Khatmandu, Nepal.
Haba pynpaw ia ka jingsngewlem halor kane ka jingjia, u Myntri Rangbah Duh ka Ri Narednra Modi ula ong ba ka India ka ieng ha syndak ha Nepal bad kan ai ia baroh ki lad jingiarap kiba donkti.
