Shillong, Naiwieng 04 : Katba ka jingdawa pynrung ia Ktien Khasi bad Garo ha ka khyrnit ba phra ka Riti Synshar ka Ri kala nang jur ha Jylla, ka Sorkar Meghalaya kala rai ban nang tynruh ha kaban kyntiew ia ka thoh ka tar bad ban kyntiew ia ki ktien lajong da ka jingthmu ban pynthikna ba kin ioh rung noh hapoh ka khyrnit ba phra ka Riti Synshar ka Ri.
Ka Sorkar Jylla kala pynbna ruh ban bei pisa ia kine ki project ki ban nang pynriewspah ia ka thok ka tar dala ka jong ka ktien ka thylliej, ka kolshar bad ki jingleh tynrai.
U Myntri Rangbah ka Jylla Conrad K Sangma ha ka sngi Saitjain, ula pynbna ba ka Sorkar Jylla kan ai ka jingkyrshan ia ki kam wadbniah (Research), pynwandur bad kyntiew ia ki ktien lajong da kaba ai jingiarap song pisa sha ki scholar bad ki nongthoh kot.
Haba kren ha ka Babu Hajom Kissor Sing Memorial Lecture bala pynlong da ka Unitarian Union North Eastern India ban rakhe ia ka lyngkhih sngi iap u Babu Hajom Kissor Sing ha Soso Tham Auditorium, Shillong, u Myntri Rangbah ula ong “Ha ka jingpyrshang jong ngi ban kyntiew ia ka ktien Khasi bad Garo, ngi dei ban iawanlang kum ka imlang sahlang ban kyntiew iala ka kolshor bad ka ktien ka thylliej”.
Ula ong ba ka Sorkar kala iakren khlem sangeh bad ka Sorkar Pdeng ban pynrung noh ia ka ktien Khasi bad Garo ha ka khyrnit ba phra jong ka Riti Synshar ka Ri India, ka ban sa ai ka jingithuh noh ia kine ki ktien hapoh ka Ri.
Ula ong ba ka jingbuh jingthoh ia ka kolshor bad ka ktien ka dei kaba kongsan bha bad haba iohi ia kane ka jingkong san, ka Sorkar Jylla kala wanran da ka prokram ba kyrpang ban kyrshan ia ki nongthoh bad ki nongwad bniah da kaba thmu ban kyntiew ia ka ktien lajong bad ka kolshor ki nongshongshnong.
“Ngi dang pynwandur ia ka policy bad ngin sa buh pahuh ia ka pisa na ka bynta ban leh research jong kito ki briew kiba kwah ban thoh ia kiba bun kiei kiei jong ka imlang sahlang jong ngi, ki briew jong ngi bad ki nongialam jong ngi. Ka jingthmu jong kane ka long ba ki pateng ba mynta ki dei ban tip halor ka kolshor jong ngi bad ka jingleh tynrai jong ngi da ka ktien lajong” ula bynrap.
Ula pyntip ruh ba ia ka song pisa yn sa air uh sha ki nongshna phlim ba kin shna ia ki phlim ki ban kyntiew ia ka kolshor bad ka ktien ka thylliej jong ngi.
U Myntri Rangbah ula pyntip ruh ba ka Meghalaya Legislative Assembly kala sdang ban ai jinghikai halor ki ktien lajong, ha kaba ki MLA GAro kin ioh ia ka jinghikai ban kren bad sngewthuh ia ka ktien Khasi katba ki MLA na Khasi bad Jaintia kin ioh jinghikai halor ka ktien Garo.
