Shillong, Nailar 22: Ka Shillong Cherry Blossom Festival 2021 kala wanrah nam bad burom iaka jylla da ka jingioh khur 3 tylli ki khusnam ha ka kyrdan kaba heh, ha ka Wow Awards Asia 2022 kaba la long ha Jio World Convention Centre, Mumbai haka 19 bad 20 tarik u Nailar.
Ka WOW Awards Asia kadei ka rynsan kaba la paw ha ka pyrthei ha ka jing pynlong ia ki tamasa bapher bapher ha dewbah Asia bad ha Middle East.
Dei lyngba ka jingshimkhia jong ka EVENTFAQs ryngkat ka jingiatreilang ka EEMA bad KPMG ha India kum ki nongaibuit bad ki nongpeit bniah.
La nang pynkhlain iaka rukom bishar da ka jingdon ki nongbishar kiba dei ki riewshemphang na kylleng ki bynta jong ka pyrthei.
Ka Shillong Cherry Blossom Festival 2021 kala ioh pdiang 2 tylli ki takma ksiar kata ha ka “Festival of the Year-Art/Culture/Lifestyle” bad “Best Tourism Event” bad kala ioh ruh iaka takma rnong haka “Concert of the year”.
Ia ka Shillong Cherry Blossom Festival la pynlong da ka Meghalaya Tourism bad la pyniaid da ka Rockski EMG.
Kine ki Nongpyniaid kila ai khublei iaka jingjop jong kane ka tamasa sha baroh kito kiba la trei shitom met bad mynsiem ban pynlong syndon ia kane ka tamasa ban ioh pdiang ia ki khusnam.
