Shillong, Jylliew 15: Ka Mawlai ka la ioh ban pynliem haduh 2-0 kol ia ka Nangkiew Irat ha ka jingiakhun sdang jong ka Shillong Premier League kaba long ha ka janmiet sngi Balang ha madan Third Ground, Polo.
Ia kitei ki ar kol jongka Mawlai la ioh ban thep da u Manbha Iawphniaw ha ka minit kaba 52 katba ia ka kol kaba ar pat la ioh ban thep da u Damonlang Pathaw ha ka minit kaba 58 jong ka kylla miet hi.
Kumbn shu phaidien, ia kane ka lympung la lah ban pynlong biang hadien ar snem na ka daw ka jingwan syllad ka khlam COVID kaba la hap ban pynsangeh lut ia ki lympung ialehkai bapher bapher ha ka jylla.
La sakhi ruh ha kane ka sngi ryngkat ka jingtuid ki nongpeitkai, baroh arliang ki la iakhun tyngeh bha ha ka kylla hynrei khlem don satia ba ioh ban thep kol.
Hynrei dei tad ynda la poi ka kylla miet ba ka jingiakhun ka la kham itynnad bad dei ha katei ka por ba ka Mawlai ruh ka la ioh ban thep ia ka kol kaba nyngkong jong ka lyngba u Manbha.
Watla ka Nangkiew ka la pyrshang ban iakhun tyngeh hynrei khyndiat minit hadien kane ka Mawlai ka la ioh biang sa shi kol lyngba u Damonlang kaba pynlong ia ka kynhun ban ioh lamkhmat haduh 2- kol tad haduh ban da kut ka por ialehkai.
