Shillong, Naitung 28: Ka Manu Bhaker, ka nongsiat suloi ka India kala thaw ia ka histori ha ka Paris Olympics 2024 da ka jingioh khur ia ka takma rnong ha ka jingiakop phainal jong ka 10m air pistol ki kynthei da kaba ioh 221.7.
Ha ka rta kaba 22 snem ka rta, ka Bhaker ka la long ka kynthei India kaba nyngkong eh ban khur takma ha ka Olympic ha ka jingsiat suloi.
Ka Bhaker kala mad ïa ka jingïakhun kaba tyngeh naka Trinh Thu Vinh jong ka Vietnam bad ka Li Xue jong ka China, ha kaba kala lah ban ioh kiew ha ka rynsan sam takma.
Kane ka jingjop ka wan hadien lai snem hadien ka jingthut jong ka pistol kaba la pynkut noh kloi ïa ka jingïakhun jong ka ha ka Tokyo 2020.
Ka dei ka nongsiat suloi ba nyngkong eh na India bad ka nongïalehkai kynthei ba nyngkong eh na India ban khur ïa ka takma ksiar ha ka Youth Olympics ha Buenos Aires ha u snem 2018. Ka la ïoh ruh ban khur ïa ki nam lahduh ha ka Commonwealth Games bad Asian Games.
Ha ka jingïakob phainal jong ki kynthei 10m Air Pistol, ki nongsiat na ka Ri Republic of Korea ki la jop, ha kaba ka Oh Ye Jin ka la buh ïa ka rekod ba thymmai ha ka Olympic da kaba kamai 243.2, da kaba tam ïa ka Vitalina Batsarashkina kaba la ïoh 240.3 na Tokyo 2020.
Ha ka jingiakop ialehkai 10m air rifle jong ki shynrang, u nongsiat suloi na India u Arjun Babuta u la wan ha ka kyrdan kaba hynniew da kaba ioh ia ka 630.1 bad ka la pyntikna ia ka jaka sha ka phainal. Hynrei u Sandeep Singh, uwei pat u nongsiat suloi na India ha kane ka jingïakhun, u la wan ha ka kyrdan kaba 12 da kaba kamai 629.3.
